Gorlizko gaztea atxilotu dute ustez Berangoko The Image dantzalekuari su ematen saiatzeagatik
2005ko aza. 13a, 21:59
Ertzaintzako agenteek E.U.R. 23 urteko Gorlizko bizilaguna atxilotu dute gaur goizaldean, Berangoko The Image dantzalekuari su ematea leporatuta, Eusko Jaurlaritzako Herrizaingo Sailak jakinarazi duenez. 05:00ak aldera, Getxoko ertzain-etxeko agenteak bertara joan dira, hango segurtasun-langileek gaztea geldiarazita baitzuten. Susmagarriak bidoi bateko erregaia isuri omen du establezimenduko atarian, eta berehala su hartu du. Heldu direnean, dantzalekua hutsik ikusi dute ertzainek, eta zaindariekin mintzatu ostean, langileek E.U.R. polizien esku utzi dute, dantzalekuari erregaia bota eta su ematea leporatuz. Agenteek gaztea atxilotu dute, edari alkoholdunen eraginpean egotearen zantzuak zituela. Argazkia: Sutearen ondorioz, dantzalekuaren kanpoaldea belztuta geratu da, eta barrualdeak, atariko aldeak hain zuzen, zenbait kalte izan ditu.Ertzaintzak istilua zerk eragin duen argitzeko ikerketa hasi du, eta, uste dutenez, atxilotutakoak liskarren bat izan du dantzalekuaren barnean eta, hori dela eta, su eman dio gero establezimenduari.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun