Jose Antonio Cotrinak (Gasteiz, 1972) idatzitako istorioa etorkizunean girotuta dago. Sare informatikoak izugarri konplexu egin dira, nanoteknologiari eta errealitate birtualari esker. Gizakiak osorik konekta daitezke sare horietan, bakoitzak gorputzean daraman nanoteknologiaren bidez eta bestelako periferikorik gabe. Horixe du abiapuntu genero beltzaren kutsua daukan ipuin honek. Protagonista, Pragako kalezuloko pirata gaztea, bere anaiari zer gertatu zaion argitzen ahaleginduko da, egoera misteriotsuan hil baita. Arrastoaren atzetik, mundu osoa hartzen duen konspirazioa aurkituko du protagonistak, eta aldi berean inplikatuta dauden guztien jomuga bihurtuko da.
Jose Antonio Cotrina "genero honetako idazlerik emankorrenetako bat da estatuan", unibertsitateko iturriek adierazi dutenez. Publizitatean eta Harreman Publikoetan lizentziatu zen EHUn, eta 90eko hamarkadaren amaiera aldean hasi zen bere lanak argitaratzen. Dena dela, 2000an sendotu zen maila handiko idazle bezala, zientzia-fikzio sari garrantzitsu bi eskuratu zituenean: Alberto Handia saria eta Kataluinako Unibertsitate Politeknikoko (UPC) saria. 2003an "Las fuentes perdidas" nobela argitaratu zuen.
Beste bi sari
Alberto Handia literatur lehiaketaren XVII. edizioan aurkeztu diren 39 ipuin lehiaketatik, bigarren saria (1500 euro) Juan Luis Lopez Arangurenek eskuratu du (Zizur Nagusia, 1982), "Las lágrimas de Caín" ipuinarekin. Etorkizun hurbilean kokatuta, Kainen kontrako epaiketan, aingeru batek antropologo bati abokatu lana egiteko nola eskatzen dion kontatzen du ipuinak. López Aranguren Kazetaritzan lizentziatua da, eta orain Ekialdeko Asiako Ikasketak egiten dabil.
Azkenik, EHUko kide batek aurkeztutako ipuin onenaren saria, 1500 eurokoa, Jose Manuel Gonzalez Rodriguezek irabazi du (Sopela, Bizkaia), "Las dudas de Job" ipuinarekin. Itsas armadako teniente bat eskolta lana egitera joan da ia mortu dagoen planeta batera, eta han bera baino indartsuagoa den automata bati egin beharko dio aurre. Etxean erabiltzeko robota du lagun bakar, baina matxuratuta dago. Konpontzen saiatzean, handiagotu egiten zaio adimena, eta, ondorioz, arazo psikologikoak sortzen zaizkio.
Jose Antonio Cotrina idazle gasteiztarrak irabazi du Alberto Handia zientzia-fikzio saria
Alberto Handia 2004-2005 ospakizunen barruan, izen bera daukaten zientzia-fikzio sarien XVII. edizioa irabazi duten idazleen izenak eman ditu ezagutzera EHUko Leioako campuseko Zientzia eta Teknologia Fakultateak. Lehiaketa 1989an abiatu zen, eta unibertsitateko arduradunek harro daude, "genero horretako zaharrena delako estatu espainiarrean". Gainera, sari handiena ematen duen zientzia-fikzio ipuinen lehiaketa ere bada (aurten handitu egin dira sariak), aipatu dutenez. Lehen saria, 3.500 eurokoa, Jose Antonio Cotrina (argazkian) gasteiztarrak irabazi du, "Argos" ipuinarekin. EHUko kide batek aurkeztutako ipuin onenaren saria, berriz, Sopela aldera joan da. 1500 euro irabazi ditu Jose Manuel Gonzalez Rodriguezek, "Las dudas de Job" ipuinarekin. Argazkia: Ciberdark.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun