“Ikus-entzunezkoen Rallyak, gehienez, hiru minutuko ikus-entzunezko lana sortzean datza, lehiaketa egunean eta Eibarren kokatuta”, azaldu zuen Sonia Perez Anguera Topaguneko Gazteak Saileko arduradunak lehiaketaren aurkezpenean. “Askotariko lanak izan daitezke, ez da zertan metraje laburreko filma izan”, zehaztu zuen. Lanen gaia lehiaketaren egunean bertan jakitera emango da. Parte-hartzaileek gai horretan oinarritutako lana aurkeztu beharko dute, Eibarreko ezaugarriak txertatuta eta euskaraz ekoiztuta. Alde horretatik, “hizkuntzaren presentzia ezinbestekoa izango da”, adierazi zuen Topaguneko ordezkariak.
Egunean bertan grabatu eta proiektatuko dira
Lanak abenduaren 17an bertan grabatuko dira, goizez. Ondoren, arratsaldez, ekoizpenari lotutakoak egingo dituzte parte-hartzaileek. Biak, grabaketa eta ekoizpena, formatu digitalean egingo dira. Horretarako, antolatzaileek parte-hartzaileen esku ordenagailuak eta Adobe Première 7.0 programa jarriko dituzte. “Gutxieneko baliabide teknikoak, aldiz, parte-hartzaileen kontura joango dira”, argitu zuen Perez Anguerak, hau da, “kamerak, horiei dagozkion euskarri digitalak...”.
Rallya izango den egunean bertan, hots, abenduaren 17an, grabatutako lanak proiektatuko dituzte, arratsaldeko 20:30ean. Horren ondoren, sari banaketa egongo da. Guztira, 900 euroko hiru sari emango dira: epaimahaiaren saria, ikus-entzunezkorik originalena eta gaia ondoen islatu duena. Epaimahaikideak “artea eta kultura munduko profesionalak eta ordezkariak” izango direla iragarri zuen Topaguneko ordezkariak.
Parte hartu nahi duten gazteek azaroaren 21a baino lehen izena eman beharko dute Topagunean (www.topagunea.org) edo Eibarko ...eta Kitto! Euskara Elkartean (www.etakitto.com).
Euskararen erabileran eragitea, helburu
Euskal Herriko 82 elkarte biltzen ditu Topaguneak. Hortaz, hainbat esparrutan euskararen erabileran eragitea du helburu. Horixe bera dugu Ikus-entzunezkoen Rallyaren ardatza. Alde horretatik, Topaguneko Gazteak Sailak antolatzen dituen “Gazte Sortzaile Sariak egitasmoaren barruko proiektua da Ikus-entzunezkoen Rallya”, Perez Anguerak azaldutakoaren arabera. Sariok gazte euskaldunon sormena sustatzeko antolatzen dira. Aurreko edizioan oso arrakastatsua izan zen Graffiti Lehiaketa antolatu zuen, iaz, Topaguneak. Gazte Sortzaile Sarien bigarren edizio honetan, ikus-entzunezko lanen egileei euskaraz euren ekoizpen artistikoak gizarteratzeko aukera emango die Euskara Elkarteen Federazioak.
Topagunea Euskara Elkarteen Federazioa
Astelehenera arte dago Euskal Herriko I. Ikus-entzunezkoen Rallyan izena emateko aukera
“Gazteen sormena eta ekoizpen artistikoa sustatzeko asmoz”, Euskal Herriko 1. Ikus-entzunezkoen Rallya antolatu du Topagunea Euskara Elkarteen Federazioak. Rallya abenduaren 17an izango da, Eibarren, eta udal horrexen laguntzaz antolatua izan da. Bertan parte hartu nahi duten 16 eta 35 urte bitarteko gazte euskaldunek azaroaren 21a baino lehen izena eman beharko dute. Argazkian, ezkerretik eskuinera, Jose Ignacio Insausti Gipuzkoako Foru Aldundiko Gazteria eta Komunitate ekintzako zuzendaria, Marisa Barrena Eusko Jaurlaritzako Europar Gaietan teknikaria, Sonia Perez Anguera Topaguneko Gazteak Saileko arduraduna, Koldo Mitxelena Eibarko ...eta Kitto! euskara elkartearen izenean eta Nerea Alustiza Eibarko Udaleko Hezkuntza batzordeburua, urriaren 25ean agindako aurkezpenean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun