Marokon egin behar zen azken proba bertan behera gelditu ostean, amaitutzat eman dute ETB (European Tour of Bodyboard) zirkuitua. Hortaz, David Perez sopeloztarra (argazkian / EHSF) da Europako txapelduna, denbora luzez baitzeraman sailkapeneko lehenengo postuan. Zirkuituko arduradunak saiatu dira beste proba bat antolatzen, Portugalen nahi zuten egin, baina ezinezkoa izan da, ondorioz sailkapena zegoen bezala gelditzen da. Emakumezkoetan sopeloztarra ere den Eunate Agirre laugarren geratu da.
David Perez orain bost urte ere izan zen Europako txapeldun, eta iaz, munduko zirkuitua eskuratu zuen. Lehen hamar postuetan Aritz Larrinaga euskalduna ere sailkatu da. Euskal Herriko Surf Federazioak (EHSF) jakinarazi duenez, dagoeneko ETB (European Tour of Bodyboard) zirkuituko antolatzaileek ofizialki izendatu dute txapeldun David Perez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun