Duela hiru urte jarri zen martxan Euskal Curriculuma sortzeko prozesua, Udalbiltza, Ikastolen Konfederazioa eta Sortzen-Ikasbatuazen aldetik. Urratsak eman ahala, eragile berriak gehitu dira prozesura, besteak beste EAEko Hezkuntza Saila, eta prozesuak "dimentsio handia" hartu du, Euskal Herriak Bere Eskola erakundeko kideek aipatzen dutenez. "Orain arteko kudeaketak lagun gutxiren artean egin badira ere, hurrengo ikasturtean eztabaida emateko tenorea da, alde batetik, hezkuntza esparruan, eta bestetik jendarte mailan", azaldu dute.
EHBEk egitasmo honen inguruko eztabaida ikastetxe eta herrietara garraiatu nahi du. Taldearen ustez, "egitasmo hau herritarra izateak berebiziko garrantzia" duelako, eta horregatik ikusten du "beharrezkoa" Euskal Curriculumaren aldeko aldarrikapena "lau haizetara zabaldu eta horrekiko atxikimendua sustatzea". Horixe da, hain zuzen ere, abenduaren 3ra luzatuko den egitasmo honekin lortu nahi den helburua.
Gizarteratu eta eztabaida sortu
"Ahalik eta eremu gehienetan (eskoletan, irakasleekin, gurasoekin , ikasleekin, herritar eta herri eragileen artean, orohar, jendarte mailan) Euskal Curriulumaren beharra gizarteratzea" dago EHBEk ekimen honekin lortu nahi dituen helburu garrantzitsuenen artean. Horretaz gain, Euskal Curriculumaren inguruko "eztabaida sustatzea" da asmoa: "batetik, eskoletan, informazioa erraztu eta eztabaida parte hartzailea bultzatzea; beste alde batetik, herri eragileen ekarpena jasotzeko bideak irekitzea".
Modu honetan, eta Durangora iristen den arte, liburukotea herriz herri joango da, sinbolikoki Euskal Herri osoko jakintzak bilduz. Egun bakoitzean herri batean egongo da euskal curriculuamaren artxibategia. Ekimen honek ibilbide itxura hartuko du, artxibategiak igaroko dituen herriak hurrenkera geografikoan kokatuko direlarik. Ibilbidea Durangon amaituko da, nazio mailako ekitaldi baten bidez, non herriz herri jasotako orri guztiak erakutsiko diren.
Euskal Curriculumaren txostena (pdf)
Gaur iluntzean emango zaio ongietorria Euskal Curriculumari Algortan eta ostiralean Leioan
Euskal Herriak Bere Eskola erakundearen eskutik garatzen ari den Euskal Curriculumari harrera egiteko aukera izango dute gaur iluntzean Algortako irakasleek, ikasleek, gurasoek, eta bestelako biztanleek. Algortako kultur etxean, Villamonten, 19:45etik aurrera egingo den ekitaldian, Euskal Curriculuma azaltzeko hitzaldia, bertsolari gazteen saioa eta herri ekarpenen batzea izango dituzte bertan bildutakoak. Azaroaren 25an, berriz, Leioako kultur etxera bidaiatuko du EHBEk egindako Euskal Curriculumaren artxibategi sinbolikoa. Hain zuzen ere, 18:30ean hasiko den ekitaldiak emango die amaiera Uribe Kosta eskualdean antolatutako egitarauari. Abenduaren 3an Durangora heldu bitartean, herriz herri joango da Euskal Curriculuma eta bakoitzak idatziko du bere orrietan, zein den bere herritik jaso beharko lukeen ezagutza. Izan ere, horren beharra gizarteratu eta eztabaida sortzea da EHBEren helburua. Hala ere, Euskal Curriculuma Euskal Herri osoko txokoetara zabaltzeko ekimena beraiek abian jarri arren, horretarako laguntza emateko prest diren ikasle, irakasle, guraso nahiz herritarren parte hartzea beharrezkoa dela uste dute EHBEkoek. Euskal Curriculuma sortzeko prozesuan Udalbiltza, Euskal Herriko Ikastolen Konfederazioa, Sortzen-Ikasbatuaz eta Eusko Jaurlaritzako Hezkuntza Saila ere parte hartzen ari dira. Argazkia: Urrian aurkeztu zuen "Euskal Curriculuma Herriz Herri" ekimena EHBEk / Gaztesarea .
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun