Biharamunean, azaroak 25, eraildako Lauaxeta, Lorca eta Lekuona artisten lanak biltzen dituen "Ilargi handi, zauri zarae" ikuskizuna eskainiko du Getxo Antzokian, 20:00etatik aurrera, Zura taldeak. Sarrerak dagoeneko salgai daude, 6 eurotan. Euskara Jardunaldiak asteburuan zehar jarraituko dute. Larunbatean, azaroak 26, haurrentzako jaia izango da Algortako San Nikolas plazan, eguerdiko 12etan. Bertan, gaztetxoenek Zirko Eskola antolatutako ekitaldiez, Eriz Magoaren ikuskizunaz eta musikaz gozatu ahal izango dute. Abenduaren 3ra bitartean ere egongo da zertaz gozatu: Gazte hizkera ikastaroa (azaroak 26 eta abenduak 3); Mikel Urdangarinen kontzertua (azaroak 27); Ander Lipus, Andoni Egaña eta Aitor Agirianoren "Bertsotranpak" (azaroak 29); Jon Urraza eta Jon Zubiagaren "Bob? Nor da Bob?" (azaroak 30); Patxo Telleria eta Mikel Martinezen "Larru Haizetara" (abenduak 1); "Ahatearen dantza" jokoak eta erromeria Patxi Perezen eskutik (abenduak 2); eta "Aupa Etxebeste" filmea (abenduak 3), hurrenez hurren.
Xabierko Frantzisko Deuna
Euskararen Nazioarteko Eguna abenduaren 3an ospatzen da, hau da, Xabierko Frantzisko Deunaren egunean. Euskararen lehenengo eguna duela 50 urte baino gehiago ospatu zen, 1949an, Ipar Euskal Herrian, Parisen, Mexikon, New Yorken eta beste hainbat lekutan. 1995ean, Uruguaiko euskaldunek egun handitzat zutena Euskararen Egun ofizial izendatzeko eskaera egin zuten eta Eusko Jaurlaritzak eta Euskaltzaindiak ontzat eman eta, beraz, abenduaren 3a, Xabierko Frantzisko Deunaren eguna, Euskararen Eguna izendatzea erabaki zuten.
Getxoko Udalak ere badaramatza urte batzuk Euskararen Eguna ospatzeko ekitaldiak antolatzen; aurtengo edizioa zazpigarrena izango da. Urtero bezala egitarau zabal, erakargarri eta anitza egiten saiatu gara, gustu eta adin guztietako getxotarrak aseko dituen egitaraua, hain zuzen.
Azaroaren 22tik abenduaren 3ra bitartean martxan izango den aurtengo trenak hainbat eta hainbat bagoi dauzka: bertsolaritzaren ingurukoa da bagoi bat, bestea musika entzutekoa, beste batean kirolariak izango dira solasean, eta antzerkia, umorea eta zinea ere izango ditugu. Berri-berriak, inoiz ikusi gabeak dira bagoi batzuk eta beste batzuk urtean zehar han eta hemen sortu eta Algortara etorriko direnak.
"Ez dugu ahaztu behar azken urteotan atzerriko jende asko etorri dela udalerrira bizitzera. Bistan da oso garrantzitsua dela horien eta bertokoen arteko integrazioa; horretan, zer esanik ez dago, hizkuntzak, hau da, euskarak, berebiziko garrantzia izango duela", udal arduradunek nabarmendu dutenez. Horri begira, Getxoko Udaleko Euskara Zerbitzua eta Inmigrazio eta Kulturarteko Zerbitzua elkarlanean ari dira etorkinen artean euskara zabaltzeko asmotan. Euskara Jardunaldien aurtengo trenak ere badu bagoi "interesgarri bezain freskoa", helburu hori lortzeko bidean beste urrats bat izan nahi duena.
"Gure aitzindari euskaldunek euskara sortu zuten elkar ulertzeko eta elkarri haien sentimenduak eta premiak agertzeko. Eta, ahoz aho, belaunez belaun, gureganaino helarazten jakin dute. Eskerrak, beraz, gure aitzindariei eta gaur egungo guraso, irakasle eta herritar guztiei antzinako eta, era berean, etorkizuneko hizkuntza horren jabe egin gaituztelako. Geure ardura da, orain, kateari eustea, hartu dugun ondare hori gure ondorengoengana hel dadin. Tren honetara igo nahi al duzu?", diote Getxoko Udaletik.
Ikusi egitarau osoa agendan
"Hitzak egin gaitu ezer" bertsolaritzaren gaineko erakusketa asteartean zabaldu zen arren, gaur bertan emango zaie hasiera Getxoko VII. Euskara Jardunaldietako ekitaldi potoloei. Getxoko Udaleko Euskara Zerbitzuak "Igo euskararen trenera!" izenburupean antolatutako egitarau zabalaren barruan, "Gailurrak eta paretak" hitzaldia eskainiko dute, 20:00etatik aurrera, Algortako Getxo Antzokian, Josune Bereziartu, Eneko eta Iker Pou, Jon Beloki eta Rikar Otegi eskalatzaile profesionalek (sarrera dohainik). Horretaz gain, ekimen bitxia bezain erakargarria prestatu dute Basagoiti etorbideko The Piper´s Irish Pub tabernan, larunbata bitartean. "Munduko afariak, afari mundialak" izenburupean, Ekuador, Venezuela, Filipinak edo Ukraniako jaki gozoak eskainiko dituzte euskaraz, gure hizkuntza ikasteko Aisa izeneko oinarri-oinarrizko izeneko ikastaroa egiten ari diren etorkinek eta beste hainbat getxoztarrek, giro alaiean. Erreserbak egiteko 944 911 185 telefono zenbakira deitu beharko da; prezio merkeak jarri omen dituzte. Argazkian, Imanol Landa Presidentzia zinegotzia, Iñaki Zarraoa alkatea eta Enrique Bosque Getxoko Kultur Etxeko arduraduna, jardunaldien aurkezpenean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun