Datien arabera, 10.000 biztanleko Gipuzkoan 6,19 emakume dira erasotuak, Bizkaian 8,23 eta Araban, azkenik, 9,06. Urterik urte gora egiten ari da ustezko erasotzaileak direlakoan Ertzaintzak atxilotutako gizonezkoen kopurua. Aurten 665 atxilotu dituzte, 2004an epe berean baino %51 gehiago.
Erasoak saihesteko sistemak "hobera" egin du
Tratu-txarrak saihesteko, mehatxatatu dauden emakumeak babesteko eta erasotzaileak atxilotu eta epailearen esku jartzeko Ertzaintzak duen lan-sistemak "hobera" egin duela dio Herrizaingo Sailak. "Gaur egun, protokolo bat jarraitzen duen prozedura dago, horrelako delitu zehatzetan eraginkortasunez jokatzeko. Prozeduraren zenbait ataletan EHUko adituek parte hartu dute; prozedurak biktimaren arreta hobetzen du, eta poliziaren, epaileen eta osasun-zerbitzuen arteko elkarlan eraginkorragoa ahalbidetzen du", azaldu dutenez.
Horretaz gain, prozedurak biktima zein arrisku egoeratan dagoen adierazteko balio duela diote Jaurlaritzako arduradunek, eta "Ertzaintzak kasu bakoitzean biktimari nolako babesa eman behar dion jakiteko ere balio du; gertuen dagoen komisariarekin telefono bidezko harremana eskaintzetik, etengabeko babesa eskaintzera arte, kasuaren larritasunaren arabera". Javier Balza sailburuak legegintzaldi honen hasieran aurreratutakoaren arabera, jarduteko prozedura hau Ertzaintzatik kanpoko kontrolatzaileek aztertzea da Herrizaingo Sailaren helburua, "horrela homologatutako kalitatearen ziurtagiria lortzeko".
Ertzaintzak 665 gizonezko atxilotu ditu aurten bikotekidea erasotzea leporatuta
Aurtengo lehen hamar hilabeteetan 665 gizonezko atxilotu ditu Ertzaintzak bikotekidea erasotzea edota urruntze agindua urratzeagatik, Eusko Jaurlaritzako Herrizaingo Sailak jakinarazi duenez. Polizia autonomikoaren ekintzen datu estatistikoen arabera, epe horretan, 1.690 emakumek jasan dituzte bikotekide edo euren lagun izandakoaren erasoak EAEn. Horietako hiru hil egin dira, Jaurlaritzako iturrien arabera, eta beste 781 emakumek maila ezberdineko zauriak izan dituzte. Barrikako Aintzane Garai zena izan da erkidegoan erail duten azkeneko emakumea, joan den urrian. Erasoak jasandako emakumeen kopuruak gora egin du apur bat (%0,6) 2004an epe horretan izan ziren datuekin alderatuta, nabarmendu dutenez. Iaz, 1.680 emakumezkok jarri zuten salaketa, bikotekidearen erasoak zein tratu txarrak izan ondoren. Argazkian, Javier Balza Herrizaingo sailburua.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun