Getxoko PPk "instituzioen esku-hartze handiagoa" eskatu du, "genero indarkeriarekin bukatzeko"
Ostiral honetako osoko bilkuran eztabaidatua izango den mozioaren bidez, "instituzioen esku-hartze handiagoa" eskatu du Getxoko PPk, "behingoz genero indarkeriarekin bukatzea lortzeko". "Gizarteko gaitzik handienetakoa da. Hortaz, gure eskuetan dagoen guztia egin behar dugu botere publikoek horrekin amaitzeko", adierazi du Marisa Arrue (argazkian) popularren bozeramaileak. Hori dela eta, "bakoitzak hartutako konpromisoak bete" ditzala eskatu die Espainiako Gobernuari, Eusko Jaurlaritzari eta Eudeli: "Moncloak finantziazioa eta lege-erreformak areagotu ditzala; agindu bezala, Lakuak erasoetatik babesteko gailu elektroniko eta informatikoak eman diezaiela biktimei; eta Eudelek Berdintasunaren Aldeko eta Emakumeenganako Indarkeriaren Kontrako Udalerrien Sarea sortu dezala behingoz", Arruek azaldu duenez.
Getxoko PPko buruak baieztatu duenez, "beldurtzekoak" dira Eusko Jaurlaritzako Justizia Sailak emandako azken datuak, "urteko lehenengo sei hilabetetan eguneko tratu txarren hamar salaketa baino gehiago egon direlako EAEn", azaldu duenez. Euren bikotekideek edo lagun ohiek eraildako emakumeak hiru izan dira erkidegoan; Barrikako Aintzane Garai izan da azkena. Instituzio guztien bateratua eta sendoa behar dugu, ezin gara Getxoko Udalean egiten ditugun urteroko asmo adierazpenetan gelditu. Adierazpen baliogarriak dira, baina urrunago joatea beharrezkoa da, tratu txarren biktima izan daitezkeenei babes handiagoa emateko", ohartarazi du Arruek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun