Niko Etxarten kontzertuak emango dio hasiera gaur iluntzean Sopelako Euskararen Asteari
2005ko aza. 25a, 09:27
Niko Etxart zuberotarraren abestiek emango diote hasiera, gaur iluntzean, Sopelako Euskararen Asteari. Euskal rockaren aintzindari ezaguna izan arren, oraingoan kantu tradizionalean oinarritutako errepertorioa osatu du "Eperra" diskoan, bere aita Dominika Etxart eta Robert Larrandaburu koinatuarekin batera. Zuberoako kanta zaharrak bildu dituzte eta hainbat eskualdetako ohiturari lotua dagoen ahots hutsean abesten dute. Kantatzeko erabiltzen duten teknikari "bortü botza" deitzen diote eta Pirinioetako artzainen kantatzeko era naturala da. Emanaldia 21:30etik aurrera izango da, udaletxeko karpan. Abenduaren 9ra arte luzatuko da Sopelako Euskararen Astea. Argazkian, ezkerretik eskuinera, Dominika Etxart, horren semea Niko eta Robert Larrandaburu / Aizu.net.Ekitaldi azpimagarrienei dagokienez, larunbat honetan, "Dir-dir" Kukubiltxok sortutako azken ikuskizunaz gozatu ahal izango dute txikienek, 18:00etatik aurrera. Nagusiei begira, "Ezetz lepoa jarri" antzazlana eskainiko du Kanpingags konpainiak, azaroaren 30ean, 20:30etik aurrera. Hurrengo egunean, Xabier Paia eta Amuriza bertsolariek alaituko dute triki poteoa. Eta musikari helduz, abenduaren 2an, Karidadeko Bentaren doinu urrun eta hurbilak egongo dira entzungai, 21:30ean hasita. Biharramunean, umeentzako "Cantervilleko Mamua" antzezlana izango da, 18:00etan. Azkenik, Euskararen Asteari bukaera bikaina emateko, abenduaren 9an, Benito Lertxundik emango du kontzertua Urko kiroldegian. 21:30etik aurrera, plazaratu berri duen azken diskoko kantuak eta dagoeneko ezagunak direnak eskainiko ditu abeslariak. Azken emanaldi hau eta triki poteoa izan ezik, aipatutako beste guztiak udaletxeko karpan izango dira. Bestela ere, puzgarriak, jolasak, tailerrak... izango dituzte gainontzeko egunetan neska-mutilek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun