Metro bateko zabalerako arrapalak lau zatitan jarri dituzte: Sarrikobaso eta Bidezabal kaleen arteko biribilgunetik Urkiola kalerainoko zatian, bi zati jarri dituzte ezkerreko aldeko espaloian. Beste biak gune horretatik Bidezabalgo metroko geltokiraino doaz. Aldapa osoan lorak eta argiztapena berriztu dituzte. "Oinezkoen segurtasuna ere bermatuko da", arrapala eta errepidearen artean "material sendoa" jarri baitute, udal arduradunek azaldu dutenez. 8’3 graduko malda eta 18 kilometro orduko abiaduran, aulki gurpildunak ere ibili ahal izango dira arrapaletan. Jakinarazi dutenez, ez dute espaloietan tokia kentzen, errepideetan baizik; eta orduko 9.000 lagun eraman ahal izango dituzte.
48.000 lagunei mesede
Andres Uriartek Hirigintza zinegotziak ekipamendu berri horren "garrantzia" nabarmendu du, "egunero Bidezabalgo metro geltokia erabiltzen duten 20.000 lagunei eta Algortako osasun zentrora joaten diren beste 28.000ri zerbitzua eskainiko dielako". Uriartek azaldu duenez, Ereagako igogailua eta espaloiak handitzeko edota barandak ipintzeko lanekin batera, Getxoko Udal Gobernu Taldeak legegintzaldi honetan Irisgarritasunaren Planaren barruan abiatu asmo dituen ekintzetako bat dira Bidezabalgo arrapala mekanikoak". Adierazi duenez, Villamonte eta Algortako metro geltoki arteko eskailera mekanikoak eta igogailua, eta Salsidu kaleko arrapala mekanikoak ere "laster egingo dira".
Getxoko Udaleko ordezkari politikoek eta teknikariek lagunduta, Algortako Bidezabal kaleko arrapala mekanikoak inauguratu ditu gaur eguerdian Iñaki Zarraoa alkateak. Benantzio aldea, osasun zentroa eta metro geltokia lotuko ditu ekipamendu berriak, udal arduradunen hitzetan, Getxoko Irisgarritasun Planean jasotako ekintzen barruan. Bidezabalen arrapalak jartzeko 977.000 euro bideratu ditu Getxoko Udalak. Besteak beste, 7:00etatik 23:00ak arte ibiliko dira eta monitoreen bitartez egongo dira zainduta, Udaltzaingoarekin lotutako sistema erabiliz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun