Garai honetan aurrekontu proiektu desberdinak dituzte eztabaidagai instituzioek. Plataformaren ustez, etxebizitza eskubidea bermatzeko borondate politikoa bezain garrantzitsuak dira baliabideak eta politika eraginkorrak abian jarri ahal izateko beharrari egokitutako aurrekontu publikoa ezinbestekoa da.
Etxebizitza Guztiontzat! taldearen iritziz, errealitatea bestelakoa da. Plataformak EAE eta Nafarroako Gobernuen aurrekontuak aztertu ahal izan ditu eta atera duen ondorioa argia bezain larria da: erabilitako baliabideak ez zaizkio arazoari egokitzen. Izan ere, gobernuok lurralde bakoitzaren BPGaren %0,3 eta %0,4ko ahalegina egiten ari dira arlo horretan. Hale ere bestelako gastuek, militarrek adibidez, lehentasun handiagoa omen dute, Hego Euskal Herria kupoaren bidez BPGaren %2,4a xahutuko baita, hein handi batean kontzeptu horretan.
Borondaterik ezean
Arlo publikotik etxebizitzarako sarbidea pertsona guztiei bermatzea ezinezkoa dela maiz esaten da, behar besteko dirurik ez dagoelako, Hala ere, "datuek gabezia oinarrizko behar hau asetzerako baliabide maila handiagoa inbertitzeko borondaterik ezean datzala garbi uzten digute", plataformaren arabera.
Baina etxebizitza eskubidea ez da bakarrik Gobernu autonomikoen ardura. Plataformak udal zein aldundiei aurrekontuetan eta finantza jarreran lehentasun hori islatzea eskatu die: "maila guztietan espekulazioarekin amaitzen lortzen ez dugun bitartean, ekimen publikoa bera etxebizitzarako sarbidean beste eragozpen bat izango da".
Amaitzeko, Etxebizitza Guztiontzat! plataformak alokairu publikoaren aldeko apustu sendoa berretsi du, "sarbide unibertsala bermatu ahal izateko". Horretarako, behar besteko baliabide publikoak jartzeari premiazkoa iritzi diote.
Etxebizitza Eskubidea bermatzeko aurrekontu justuen aldeko kanpaina aurkeztu dut
Etxebizitza Guztiontzat! Euskal Herriko plataformak "Aurrekontu Publikoak eta Etxebizitza Eskubidea" kanpaina aurkeztu zuen ostiralean. Kanpaina horren bidez etxebizitza eskubidea bermatzeko aurrekontu justuen aldeko ekimena jarriko dute abian. Plataformak ia bi urte daramatza etxebizitzarako eskubidea aldarrikatzen eta ehun bat taldek burututako hausnarketa prozesuaren ondoren, eskubide horren aldeko manifestua adostu zuen. Era berean, denbora horretan zehar etxebizitzarako sarbidean biztanleek dauzkaten arazo larriak hainbatetan salatu ditu, baita administrazio desberdinek oinarrizko eskubide hori bermatzeko ardura bete dezaten aldarrikatu ere. Argazkia: Etxebizitza Guztiontzat!
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun