Leioako alkateak azaldu duenez, "suteen egileek ez ziren txabolak erretzera mugatzen; lapurtu ere egiten zuten bertan. Gainera, 19:00etatik 05:00etara izaten ziren gertaerak. Hortaz, gauaren babesa bilatzen zuten".
Azken hiru hilabetetan, Sopela, Getxo, Erandio eta Leioan 15 txabola eta, azken udalerri horretan, utzitako baserri bat erretzea leporatuta, 25 eta 29 urteko bi leioztar atxilotu zituzten atzo, abenduak 13. Karmelo Sainz de la Maza Leioako alkateak (argazkian) gaur jakinarazi duenez, suteak hasi eta berehala hasi zituen ikerketa lanak bertoko Udaltzaingoak. Gauzak horrela, txaboletako baten inguruan aurkitutako ziklomotorra abiapuntutzat hartuz, behatze lanekin hasi ziren, azkenik, lehen aipatutako bi gazteak atzemanez. Epailearen esku daude biak. Gertaerekin zerikusia izan dezakeen hirugarren lagun bat badagoela ere adierazi du Sainz de la Mazak. Hala ere, epaileak erabaki beharko du tartean dagoen ala ez, zehaztu duenez. Leioako Udal Musika Bandaren musika-tresnen ustezko lapurrak ere izan daitezkeela aipatu du udal agintariak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun