Metroa gabon gauean eta goizeko 5etan ireki dadin PPk eta EBk egindako eskaerak astelehenean eztabaidatuko dira

Erabiltzailearen aurpegia Ukberri 2005ko abe. 16a, 20:41
Esther Martinez Fernandez PPko legebiltzarkideak Bilboko metroak gabon gauean eta gabon zaharrean zerbitzua eman dezan aurkeztutako proposamena astelehenean aztertuko du EAEko Legebiltzarreko Lurralde Antolamendu, Garraio eta Ingurumen Batzordeak. Abenduaren 9an Martinezek egindako legez besteko proposamenean popularrek legebiltzarrari eskatzen diote Eusko Jaurlaritzarengana zuzentzeko, Bizkaiko Garraio Partzuergoa eta Metro Bilbaorekin berba egin dezan, azken horiek metroa gabon gauean eta gabon zaharrean ireki dezaten. Ez da Metroak azken egunotan jaso duen kritika bakarra. izan ere, Ezker Batuak herenegun plazaratu zuen 20.127 pertsonek bat egin dutela metroa goizeko 5etan ireki dadin alderdi federalistak egindako sinadura kanpainarekin. Proposamen hori aztertuko du astelehenean ere Bizkaiko Batzar Nagusietako Azpiegitura Batzordeak. Batzordeko gai zerrendan PPren eskaera eta beste alderdienak ere jasotzen dira.
Metro Bilbaok “era harrigarrian” gabon gauerako zerbitzurik antolatu ez duela adierazi dute popularrek aurkeztu duten proposamenean. Era berean, metroko arduradunek bere garaian gabon zaharrean zerbitzua emateko jarritako oztopoak eta azkenean “gobernu abertzaleen” trabak gainditu zirela gogoratu dute: “egun, esan dezakegu denborak frogatu duela ezezko jarrera okerra zela”. Gainera, popularrek gogora ekarri dituzte metroak hainbat jai eta ekitaldietarako jarritako zerbitzu bereziak, eta nabarmendu dute aurten Gabonetako jaiak asteburuetan direla. Proposamena eztabaidatu bitartean honako hauek dira Metro Bilbaok gabonetan emango dituen zerbitzuen ordutegiak.
Jendartea
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun