"Auzoko Gelak behar kulturak eta sozialak asetzeko jaio ziren, nolabait alde horietan egitasmo dinamizatzaileak sortzeko", Leioako udal arduradunek adierazten dutenez. Hortxe ditugu Lamiako, San Bartolome eta Pinuetako kultur zentroak, non Gabonetarako zenbait ekintza antolatu dituzten. Lamiakoko Auzoko Gelak prestatu du ekitaldirik ikusgarriena: TTR-Xilipurdik eskainiko duen “Kalejira Dixie” izeneko kale antzerkia, hain zuzen ere. Talde horretako kideek 20ko hamarkadaren hasieran AEBetako New Orleans hiriko kaleetan entzun zitezkeen orkestren doinuak ezagutzera emango dituzte; Dixieland aroan oinarrituta dago. Beraz, haize-instrumentuak nagusi izango dira abenduaren 23an, Lamiakoko metro geltokiko plazan, arratsaldeko 5etan hasita. Argazkia: Dixieland muziekbureau.
San Bartolomen, hainbat jarduera egongo dira, Auzotarrok kultur elkartearen eskutik. Hilaren 24an, Olentzeroren bisita izango dute bertokoek, arratsaldeko 6etan, eta opariak banatuko omen dira. Bestalde, abenduaren 28an, asteazkena, BECeko Gabonetako Parkera joateko txangoa aurreikusi dute. Informazioa lortu edota izena eman nahi izanez gero, San Bartolomeko kultur etxeko kafetegira jo daiteke. Azkenik, Pinuetan, Gabonetako Jaia egin eta Gabonetako Parkera joan berri ondoren, partxis, oka, ping-pong, diana eta trivial jokoen txapelketak egingo dira, hilaren 23an.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun