Goizeko 10ak aldera, SUGAko hamabost bat lagun etxean sartu dira "opariaz gozatzeko". Eraikina maiatzean Ertzaintzak hustutako Igeltsera gaztetxearen aurrean kokatuta dago, Sopelako Udalaren lurretan, nahiz eta Urduliz eta Barrikako mugetatik oso gertu egon. Goizean hasi dira neska-mutilak etxea txukuntzeko lanetan eta lehenengo "bisitei" ere harrera egin diete. Izan ere, Sopelako hiru udaltzain gerturatu dira Elorriaganeraino. Atea zabalik zegoela ikusita, bazter guztiak miatu dituzte eta bertan zeudenei etxe barruan egoteko baimenik zeukaten galdetu diete. Gazteek fitsik esan gabe joan dira tokiko poliziak.
Ehun urte baino gehiago duen etxea bi hilabete pasatxo dabil hutsik gazteek jakin ahal izan dutenez. Lehenago, pertsona batek erabiltzen zuen squater gisa. Era berean, eta etxean topatutako dokumentazioagatik, SUGAkoek uste dute bilbotar batzuen izenean erregistratuta dagoela etxea. Sopela eta Urdulizko 30 bat gaztek egindako lanen eraginez, beheko solairua erabilgarria da une hauetan, eta aretoren batek instalazio elektrikoa konponduta dauka.
Pasa den larunbatean, abenduak 24, Sopelako Udaletxe plazan enkartelada bidez Olentzerori gaztetxea eskatu ostean, gaur goizean "gaztetxea izateko eraikin ezin hobea ate zabalik" aurkitu dute Sopela eta Urdulizko Gazte Asanbladako (SUGA) kideek, iluntzean UKBERRIri adierazi diotenez. Asanbladan bilduta, gazteek Sopelako Sabino Arana kaleko 105. zenbakian dagoen Elorriagane etxea Ganebarri gaztetxea bataiatu dute eta dei zabala egin diete bi herrietako neska-mutil guztiei "gazte topaleku berrira hurbiltzeko, auzolanetan laguntzeko eta gune autogestionatuaz gozatzeko". Horretarako, edozein ordua "ona" izango bada ere, hitzordurik egokiena gaztetxean asteazkenero arratsaldeko 7etan egingo den asanblada izan daiteke.Argazki galeria ikusteko sakatu hemen
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun