Hain zuzen ere, 2-4 eta 4-10 urte bitarteko haurrentzako bi jolasgune berri ipintzeko, zoru bigunekoak, egingo dira lanak, udal arduradunek zehaztu dutenez; baita edateko iturria jarri eta bideen egungo trazadura aldatzeko ere. Azken kontu honi dagokionez, espaloiak txikitu eta plaza handiagotuko dute. Horretaz gain, zuhaixka hesi batekin babestuko da ibilgailuetatik jolasugunea. Espaloietan, berriz, “Bilbao” erako baldosa hidraulikoa ipiniko da eta, plazako zoruan, Getxo udalerriko gainontzeko oinezkoen guneetan dagoen baldosa zimurra.
Plazako sarrera eta irteeretan oinezkoen lau pasabide “garai” ipiniko dira autoen abiadura geldotzeko eta irisgarritasuna hobetu aldera. Horretaz gain, Maximo Agirre kaleko 9. zenbakian egun dagoen autobus geltokia 13. zenbaki parera aldatuko da. Toki horretan, 10 metrokoa izango da espaloiaren zabalera eta Bizkaiko Foru Aldundiari markesina jartzea eskatuko zaio.
Urtarrilaren 5era arte egongo da ikusgai Areetako Santa Ana plazako zaharberritze lanen egitasmoa (pdf formatuan). Udal iturriek nabarmendu dutenez, egun horretara arte aurkeztu ahal izango dira proiektuaren gaineko eskaerak eta iradokizunak, Xake plazan, Getxolandian propio ipinitako etxolan. Oinezkoek aipatu eremua "gehiago erabiltzea" da Getxoko Udalaren helburua, bertatik igarotzeko zein bertan tartetxo bat emateko. Batez ere plazan diren jolasguneak erabiltzen dituzten neska-mutikoei begira egingo dituzte berrikuntza lanak. Egitasmoak 1,5 milioi euroko aurrekontua dauka eta lanak amaitzeko zortzi hilabeteko epea ezarri da. Santa Ana plazan 1996an egin ziren azken lanak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun