Grebara deitu duten sindikatuek azpimarratzen dutenez, Bizkaiko merkataritzaren langileak urtebete daramate euren hitzarmenak berritu gabe. Gainera, Bizkaiko enpresariak biltzen dituen CEBEK erakundearen jarrera atzerakoia salatu dute. ELA, CCOO, UGT, LAB eta USOk elkarrizketarako borondatea azpimarratu dute, baldin eta helburua arlo honetan lan egiten duten langileen lan baldintzak hobetzea bada.
Protestaldian Bizkaiko merkataritza, arlo orokorra, elikadura, ehungintza, larrugintza, zapatagintza, metalgintza eta altzarigintza arloko langileek parte hartzera deitu dituzte sindikatuek. Guztira, 30.000 soldatapeko langile, autonomoak zenbatu gabe. Soldatapeko beharginen herena behin behineko langilea da.
Eskaintza "erridikuluak"
Sindikatuek "erridikulutzat" jo dute CEBEK erakundearen 2005, 2006 eta 2007rako proposamenean jasotzen diren soldata igoerak eta salatu dute lan ordutegia ez dela murriztuko udako larunbat arratsaldeetan lan egitea onartu eta erretiro sariari uko egin ezean.
Horren aurrean, sindikatuek eskaera bateratua aurkeztu dute 2005 eta 2006rako. Proposamenean KPIz gain ehuneko bi puntuko soldata igoerak, 18 ordu gutxiago urtean zehar, gauez lan egiten dutenei %20ko soldata saria ezartzea eta garraio saria kilometroko 0,2 eurotan finkatzea jasotzen dira.
Bizkaiko merkataritzan lan egiten duten beharginek greba egingo dute ostegun honetan, urtarrilak 5, lan hitzarmena aldarrikatzeko, ELA, CCOO, UGT, LAB eta USO sindikatuek deituta. Hala ere, azalera handiko supermerkatuetan lanuzterik ez dutela egingo gogoratu dute langile erakundeek, horietan aparteko lan-hitzarmena daukatelako. Bestalde, egunean bertan, elkarrizketa egingo zaio Koska irratiko (108.0 FM) Goizero magazinean negoziazio mahaiko partaideetako bati, "negoziazioaren gorabeherak, prekarietatea eta sindikatuen artean eman den dei bateratuari buruz" hitz egiteko, komunikabide horretako iturriek zehaztu dutenez. Aipatu irratsaioa, astelehenetik ostiralera izaten da, 9:00etatik 12:00etara.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun