Sopelako EB-Berdeen ustez, arazoaren irtenbidea ez da "berriro ere udalbatzan bozkatzea", TAO mantendu ala ez erabakiko lukeen erreferenduma egitea baizik. "Horrela adierazten dute bildutako 4.500 sinadurek, TAOren aurkako plataformak deitutako mobilizazioetara joaten diren ehunka sopeloztarrek eta merkatari elkartearen aurkako jarrerak", nabarmendu dutenez. Horrelako gai batean "erabakitzeko ahalmena" izatea aldarrikatzen dute horiek guztiek, Ezker Batuaren esanetan.
Talde federalistak kritikatu duenez, "oztopo nabarmen" batekin jaio zen Udal Gobernuak sustatutako elkarrizketa mahaia: "azken erabakia EAJk gehiengo osoa daukan osoko bilkuran hartzearena", alegia. "Gainera, TAO mantentzea negoziaezina dela ohartarazi dute jada jeltzaleek, ordenantza abian jartzea justifikatzen zuen txosten teknikoa akatsez beteta zegoen arren. Noiz egin zeneko data ez da agertzen, orrialdeak zenbatu gabe daude eta hainbat datu oker daude: Sopelan erroldatutako ibilgailuak 15.449 dira horren arabera, erdira ere heltzen ez direnean", azaldu du Ezker Batuak.
EAJk ez guztiak ados
Azaroaren amaieran deitutako elkarrizketak "etentzat" eman zituen Ricardo Ibarra alkateordeak, ordenantza mantentzea erabaki zen osoko bilkura egin (abenduak 20) eta hurrengo egunean eman zuten prentsaurrekoan. Dena den, lehenagotik ere elkarrizketa mahaia "apurtutzat" jotzen zuten TAOren aurkakoek. Nahiz eta udal arduradunek "topaketetan proposatutako neurrietatik hamalau jaso" zituztela adierazi, "iruzur" egitea leporatu zien TAOren aurkako plataformak.
Horretaz gain, Sopela Aurrera, Ezker Batua, PP, PSE-EE, TAOren aurkako plataforma eta merkatari elkartea akordio batera heldu ziren lehen aipatutako udalbatza ospatu eta lehenago, "erabakia hartzeko jeltzaleen gehiengo osoa nahikoa izango zela argi" zeukaten arren. "EAJ laster botoa eskatu beharko dien herritarren aurka ari da gobernatzen", TAOren aurkakoek diotenez. Izan ere, euren hitzetan, "EAJ da idatzia sinatu ez duen alderdi politiko bakarra. Harrigarria bada ere, elkarrizketa mahaiaren bidez, adostasuna bilatzen ari zirela zioten, eta kanpoan gelditu dira".
Gaiaren inguruko berriak:
Berria atera bitartean, urtarrilean ere izango da baliagarri Sopelako TAO txartela (2005 Abe 29)
TAO mantentzea erabaki du Sopelako Udalak (2005 Abe 21)
"Ahal duten neurrian", TAO txartela ez berritzeko eskatu die 2005ekoa daukaten lagunei Sopelako EB-Berdeak taldeak; eta aurten eskatzekotan daudenei horrelakorik ez egiteko. Ezker Batuak prentsa ohar bidez adierazitakoaren arabera, Trafikoa eta Aparkatzea arautzen duen Ordenantza "aldebakarrak" onartu izanak sortutako gatazka konpontzeko deitu zituen biltzera alderdi politikoak, TAOren aurkako plataforma eta merkatari elkartea EAJk osatutako Udal Gobernuak. Hain zuzen ere, elkarrizketa mahai horren "porrota" dela eta, TAO txartela ez egiteko eskatu die garajean edo ordenantza aplikatzen ez den kaleetan ibilgailua aparkatzerik daukaten auzotarrei. EAJk ez beste alderdi politiko guztiek –udalbatzarrean ordezkaririk ez daukan EA barne– eta lehen aipatutako gizarte eragile biek adostutako idazkian (pdf formatuan, erdaraz) jaso bezala, TAOren gaineko erreferenduma egitea aldarrikatu dute EBkoek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun