Udazkenean hastekoak ziren arren, egunotan ekin die Astrabuduako saihesbideko bigarren zatiko lanei Bizkaiko Foru Aldundiko Herri Lan eta Garraio Sailak. "Erandioko auzo horretan trafikoa arintzea, eta era berean, Abantzada eta itsasadarreko errepidea lotuz, ordezko bide bat ematea da" azpiegituraren helburua, udal arduradunek adierazi dutenez. Gainera, Udondo eta Lamiakoko industrialdeetarako sarbideak ere egingo dituzte. 2007ko bukaeran egon liteke zabalik saihesbidea. Gehienez, orduko 50 kilometroko abiaduran baino ezin izango dira joan bertatik ibilgailuek. Argazkian, lehenengo zatia eraikitzeko Mezo kalean egindako lanak.
Bideak 1500 metro izango ditu eta 3,5 metroko errei bi (noranzko bakoitzerako bat). Metroan izango du hasiera, eta Astrabuduarako itsasadarreko sarbidearekin bat eginez, auzoa mendebaldetik inguratu eta Mezo kalean, duela urte batzuk egindako saihesbideko lehenengo zatiarekin bat egingo du. Berezitasun gisa, Udondon, itsasadar gainean, biaduktua egingo dute eta, horrek, Dow Chemical enpresako hainbat instalazio bertatik mugitzea ekarriko du. Gauzak horrela, 1991ean abian jarritako proiektuari emango zaio amaiera. Hamar milioi euroko kostua izan du, orotara.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun