Arratsaldeko zortzietarako deitutako manifestazioarekin bat eginez, ehunaka lagun irten dira kalera Aitor Elortza euskal iheslari politikoaren heriotza deitoratu eta Algortako semea zenaren familiari elkartasuna adierazteko. Ibilbidean zehar, ozen entzun ahal izan dira "errefuxiatuak eta iheslariak Euskal Herrian libre bizitzeko eskubidea" aldarrikatzen zuten oihuak; baita amnistiaren aldekoak ere. Besteak beste, Segi, Karrika gazte konpartsa, Gorrondatxe eta Itzubaltzeta / Erromoko Branka kultur elkarteak, Batasuna, Getxo Bizia herri plataforma, Amnistiaren Aldeko Mugimendua, Koska irratia, Algortako Gazte Asanblada, Euskal Herrian Euskaraz eta Amarratsak kolektiboko kideek parte hartu dute mobilizazioan. Ostiralean ere manifestazioa egongo da Algortan, 20:00etan, Telletxe plazatik abiatuta; eskualde mailakoa, hain zuzen ere.
Manifestazioa hasi baino lehenago Aitor Elortzaren heriotzaren inguruko hainbat xehetasun eman ditu Mitxel Sarasketa Amnistiaren Aldeko Mugimenduaren kideak. Preso ohiak adierazi duenez, familiak berak aurkitu zuen atzo gorpua. "Telefonoz hainbatetan deitu ostean, etxera bila joan ziren eta heldu zirenerako hilik zegoen", azaldu du. Orain, Frantziako administrazioaren eskuetan dago kontua eta autopsia noiz egingo dioten zain daude senitartekoak. Behin hori eginda erraustu egingo dute gorpua Elortzaren nahia errespetatuz eta familiak erabakiko du hausterreekin zer egin. Sarasketak jakinarazi duenez, hainbat omenaldi egiteko asmoa dago, toki desberdinetan; horietako bat Algortako Portu Zaharrean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun