Marisa Arruek larritzat jo du pailazo taldeak Getxon lan egitea eta are gehiago “Udal Gobernu taldeak gure seme-alaben aurrean antzezten baimentzea”. Bozeramaile popularraren aburuz, egoera honi heldu izana “lotsagabekeria handia iruditzen zaigu hiritarren oinarrizko eskubideei errespetu falta adierazten baitu”. Arruek ildo beretik jarraitu du: “guretzat eskubiderik garrantzitsuena bizitzarena da, eta jende horrek ez du errespetatzen”.
Biktimen memoria
Era berean, alde ekonomikotik ere eraso egin nahi izan du Arruek: “kontratu honek 10.000 euroko diru kopurua kostatuko zaio udal ogasunari eta diru hori ETAren terrorismoak gogor kolpatu duen udaleko hiritarren poltsikoetatik irteten da. Getxoztarrak garen heinean, pertsonen bizitza baloratzen ez duten pailazo taldea gure diruarekin kontratatzeak lotsarazten gaitu”. Hori esanda Udal Gobernuari eta iñaki Zarraoa alkateari eskatu die ikuskizuna bertan behera uztea, “hori egin ezean biktimen memoria iraintzen lagunduko dutelako”.
Datorren otsailaren 3an, 4an eta 5ean Pirritx eta Porrotx pailazo euskaldunek Getxoko umeen aurrean “Maite zaitut” ikuskizuna antzeztuko dute. 1987tik hona Pirritx eta Porrotxek Euskal Herriko txikienen artean bildu dituzten milaka eta milaka jarraitzaileak kontuan hartuta arrakasta ziurra da eta kostako da sarrerarik topatzea. Gauzak horrela, Getxoko PPk salatu du “Takolo, Pirritx eta Porrotx pailazo erradikalen taldearen ikuskizuna”. Marisa Arrue PPko zinegotziak gogoratu du Pirritx, Aiora Zulaika, EHko zinegotzia izan zela Lasarte-Orian “eta ez zuela gaitzetsi Froilan Elespe (PSE-EEko zinegotzia) bere kidearen erailketa”. Horretan oinarrituta, popularrek Iñaki Zarraoa alkateari eskatu diote Pirritx eta Porrotxen ikuskizuna bertan behera uztea. Argazkian, Pirritx 2005eko abenduaren 3an Asteasun emandako saioaren ostean / Luistxo Copyleft lizentziapean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun