Askatasunak atzo kaleratutako oharra:
Aitor Elortza euskal iheslari politikoa gogoratuz eta euskaldunok gure herrian libre bizitzeko dugun eskubidea aldarrikatuz, gaur, arratsaldeko 20:00etan, Algortan manifestazioa eginen da.
Une honetan familiak eta abokatuak Aitorren gorpua errausteko gestioak egiten ari dira, eta datorren ostiralean, urtarrilak 20, arratsaldeko 20:00etan, "Euskal Herria libre izateko eta Euskal Herrian bizitzeko borrokatu duzu. Euskal Herriak bere baitan gordeko zaitu" leloarekin merezi duen omenaldia eskeiniko zaio Donibane Lohitzuneko, Santa Barbara gunean. Bertan errautzak zabalduko dira lau haizetara, ordurako baimenak lortzen badira.
Hainbeste maite zuen txoko honetatik bere bihotzean zeraman Algortan igandean beste omenaldi bat eskeiniko zaio, hemen ere bere errautzak botako direlarik.
Izan zuen bizitza bezain gogorra izan da bere heriotza
1960an Parisen jaio eta handik familiaren sorterrira, Algortara, joan zen familiarekin. Gure herriaren alde borrokatzeagatik errepresioaren hatzaparretatik iheska 1980an Algorta utzi behar izan zuen, 19 urte besterik ez zituelarik. Donibane Lohitzunera heldu eta denbora gutxira Ziburun atxilotua izan zen. Hilebete batzuk Bainoako presondegian izan zuten eta askatasuna berreskuratu zuenean Mexikoko bidea hartu zuen beste hainbeste euskal herritar bezala. Euskal Herria beti buruan eta bihotzean edukiz Azteken herrian ez zuen denbora luzez egon, eta honela berriz 1982an etxeko bidea hartu zuen, berriz Donibane Lohitzunen finkatuz bere etxebizitza.
Frantses poliziek berriz 1991ko maiatzean atxilotu zuten eta Fresneseko presondegian sartu zuten 1992arte, urte betez espetxeratua egon zelarik. Atxiloketa honen inguruan 1993an izandako epaiketan absoluzioa jaso bazuen ere; berriz 1994an atxilotu zuten eta Metz-en asignatu zuten alberge baten bizitzera behartu zutelarik: prekarietatean, inseguritatean, lanik gabe, dirurik gabe, beti ere errepresioaren hatzaparren pean... handik egun batzuetara asignazioa apurtu eta Euskal Herrira bueltatzea erabaki zuen.
Errepresioa, jasarpena, inoiz jakin gabe noiz atxilotuko zuten berriro, estatuen errepresioaren hatzaparretik betik iheska... sufritu eta bizi izan zuen bizitza bezain gogorra izan da bere heriotza, izan ere azken urteetan guzti honen ondorioz harrapatu zion buruko gaixotasunak okerrera egin zuen.
Gaiaren inguruko berriak:
Aitor Elortza gogoan, ehunaka lagun batu dira Algortan (2005 Urt 17)
Aitor Elortza Algortako iheslari politikoa hilik aurkitu dute (2006 Urt 16)
"Aitor Elortza gogoan Euskal Herrian libre bizitzeko eskubidearen alde" lelopean, manifestazioa egingo da ostiralean Algortan
Ostiral honetan, urtarrilak 20, "Aitor Elortza gogoan Euskal Herrian libre bizitzeko eskubidearen alde" lelopeko manifestazioa egingo da Algortan, 20:00etan, Telletxetik abiatuta. Omenaldiaren inguruan, ostiralean bertan Donibane Lohitzunen eta igande honetan Algortan egingo direla zabaldu bada ere, oraindik ezin ditugu data horiek baieztatu. Egin, bi herrietan egingo zaizkio, bat Donibanen, Santa Barbaran, eta bestea Algortako Portu Zaharrean, Aitor zenaren errautsak leku bietan zabalduko baitira. Baina errausteko prozesua atzeratu egin denez, argitu orduko zehaztuko dira egunak. Euskal Herria libre izateko eta Euskal Herrian bizitzeko borrokatu zara. Euskal Herriak bere baitan gordeko zaitu. Argazkian, atzo Algortan egin zen manifestazioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun