Gainera, aurten, Getxo Antzoki berria altzatzeko egitasmoa zehaztea espero du Udalak. Egungo kokapenean egongo litzateke kultur aretoa, 700 bat lagunentzako tokia izango luke antzoki berriak. “Madrileko Gobernuak aurtengorako emandako 1.000.000 eurotako dirulaguntza dugu horretarako”, Iñaki Zarraoa alkateak gaur zehaztutakoaren arabera. Getxo Antzoki berria ez da neurri handietako aretoa izango, ekonomi eta bideragarritasun ikuspuntuetatik tokia handitzea baino saio gehiago egitea errentagarriagoa baita. Gainera, alkate getxoztarraren arabera, "argi dago Getxoko publikoa ekitaldi nagusiak ikusteko lurraldeko beste antzoki batzuetara joaten dela, Barakaldoko BEC tartean. Horregatik toki handi batek ez luke zentzu handiegirik izango udalerrian, osatzea eta kultur ekitaldi desberdin gehiago eskaintzea baita helburua".
Iberberango edo Ibarbengoa?
Hasiera batean, Bidezabal eta Berango artean egin nahi den metro geltoki berriari Iberberango izena jarriko zitzaiola iragarri zuten arren, azterketa toponimikoen arabera, Getxo aldeko gunea Ibarbengoa izena duela baieztatu du Iñaki Zarraoa alkateak. "Getxoko Udalbatzak erabaki beharko du geltokiari zein izen jarriko zaion", zehaztu du tokiko agintariak.
Gaur egun hainbat kirol azpiegitura dagoen Algortako hiltegiaren inguruan, Alangon, eta Bidezabal eta Berango artean metro geltokia jartzeak utziko duen zabalgunean, Ibarbengoan, bi kultur ekipamendu berri egitea aztertzen ari da Getxoko Udala. Hiltegiaren gunean eraiki nahi dutena neurri txikikoa izango litzateke, kafe antzoki baten modukoa eta, etorkizunean, industri eta etxebizitzen aldea izango den Ibarbengoakoa, berriz, handiagoa eta erabilera ugariagokoa. Bi kultur ekipamendu horien lanak datorren urtean has litezke. Algortakoa gune horretan etxebizitzak eraikitzeko aurrera eramango den egitasmoaren menpe egongo litzateke. Argazkia: Urteko kultur egitaraua aurkezteko asmoz, Elena Coria Getxoko Kultur Etxeko arduradunarekin batera gaur emandako prentsaurrekoan eman du horren berri Zarraoak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun