Gaur, otsailak 1, Bosteko'05 arte garaikideko erakusketa ibiltaria zabaldu dute Itzubaltzeta / Erromon. Urtean zehar, bost udalerritan ikus daiteke Bosteko'05 eta, otsailaren 28ra arte, Lope de Vega kaleko erakusketa aretoan gozatu ahal izango dute ikusleek. Aretoaren ordutegia honako hau da: 11:00etatik 13:00era eta 18:00etatik 21:00etara astelehenetik ostiralera, eta 11:00etatik 13:00era larunbatetan. Sarrera doakoa da. Bosteko'05 erakusketaren zortzigarren edizioak gaurkotasun handiko hiru sortzaile elkartu ditu: Mikel Diez Alaba eta Carmelo Camacho margolariek, eta Iñaki Olazabal eskultoreak "hiru aldetako elkarrizketa" osatzen dute. "Elkarrizketa honek irudien keinu adierazpenaren inguruko ñabardurak eta ezberdintasunak uzten ditu agerian. Erakusketak, lan hauen aurkezpenaren bidez, aukera ematen dio ikusleari egile bakoitzaren sorkuntza unibertsoa osatzen duten gakoak zein diren ezagutzeko", azaldu dute artistek. Argazkian, Mikel Diez Alabaren artelana, "Del exterior al interior 1971-2001" izeneko erakusketakoa.
Bosteko'05 erakusketako hiru artistek hainbat bakarkako erakusketa egin dituzte aurten. Mikel Diez Alabak erakusketak egin ditu Bilbon; Abokatu Eskolan eta Windsor Kulturgintza galerian. Carmelo Camachoren azken margolanak, berriz, Bilboko Bilkin galerian eta Deniako Emergencia aretoan izan dira ikusgai. Azkenik, Iñaki Olazabalen lanak Lapurdiko Getaryko Museoan, Angeluko Beatriz-Enean eta Andoaingo Bastero aretoan egon dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun