Getxoko Kirol Portuaren ondoan kokatua dagoen luxuzko itsas-bidaia ontzientzako kai berria gaur bertan inauguratu dute, Midnatsol ontzi norvegiarraren etorrerarekin. 2006an, guztira, 20 ontzi erraldoi porturatzea aurreikusita dute, gaur hasi eta datorren azaroaren 10era bitartean; orduan bukatuko baita itsas-bidaien denboraldia. Kai berri horren kudeatzaile den Bilboko Portu Agintaritzak jakinarazitakoaren arabera, Eusko Jaurlaritzako Garraio eta Herri Lan Sailak finantzatu du, Euskadiko Kirol Portua sozietate publikoaren bidez. Eginiko inbertsioa 12,9 milioi eurora heltzen da.
Getxo udalerriko luxuzko ontzien kai berriak 6.750 metro koadroko azalera, 355 metro luzaerako eta 17 metro zabalerako pantalana eta itsasbeheran 12 metroko sakonera ditu. Luxuzko bi itsas-bidaia ontzi hartzeko tokia dauka, edota bestela dimentsio txikiagoko beste lau itsasontzi. 1997an heldu zen EAEra lehenengo luxuzko ontzia, Santurtzira hain zuzen ere. Orduz geroztik ontzien joan etorri eta garraio hau hazten joan da, agintarien hitzetan. 2005ean guztira 21 ontzi erraldoi porturatu ziren, berauetan 13.379 bidaiari ekarriz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun