Eskolaren bidez, haur guztien euskalduntzearen beharra lau haizetara zabaltzeko, sinadurak batuko dira asteburuan Algorta, Itzubaltzeta eta Areetan

Hezkuntza eta euskalgintzako eragile ezberdinek aurkeztutako ekimenari helduz, Uribe Kosta eskualdean ere martxan da "Bai eskolak euskalduntzeari!" sinadura bilketa kanpaina. Gauzak horrela, eta Pirritx eta Porrotx pailazo euskaldunak Algortan hiru egun ezberdinetan ikusteko aukera izango dela aprobetxatuz, aldarrikapen horrekin bat egiteko aukera emango diegu, antzerki ikuskizuna ikusteko asmoz, seme-alabak Getxo Antzokira lagunduko dituzten aita-amei; baita hurbiltzen diren lagun guztiei ere. Gaur, sinadurak batzeko mahaitxoa jarriko dugu bertan, 17:30etik 18:30era. Bihar, berriz, bikoitza izango da saioa, 12:00etatik 13:00etara eta 17:30etik 18:30era. Eta igandean aurrekoan bezala. Horretaz gain, Itzubaltzeta / Erromo eta Areetan Agate Deuna bezperako koplei lagunduz bilduko dituzte sinadurak. Abeslari taldeak 19:00etatik 21:00etara ibiliko dira kantu kantari. Eskualdean herriz herrikako batzordeak ari dira sortzen. Argazkian, orain pare bat aste egin zen Uribe Kosta mailako batzarra.