Sopelako Ganebarri gaztetxean identifikatutako hiru gazte Getxoko Justizia Jauregian deklaratu behar izango dute bihar, otsailak 6, goizeko 10etan etxebizitza usurpatu izana leporatuta. "Gara" egunkariak SUGAko iturrietan oinarrituta, gazteak bihar bertan epaituak izango direla iragarri du, baina antzeko kasuetan ez da horrela izaten eta litekeena da bihar soilik deklaratu behar izatea. EAEko poliziek ostiralean identifikatu zituzten 3 gazteak, Ganebarri gaztetxeko inguruetan, eta horrezkero etxebizitza usurpatzeagatik salatu zituzten. Argazkian, SUGAko kideen kontzentrazioa iaz, Getxoko epaitegietan geroago aske geldituko ziren gazte batzuek Igeltserako okupazioagatik deklaratzen zuten bitartean.
SUGAk "Gara"ri salatu dionez, abenduaren 26an Elorduigane etxea okupatu zutenetik, Ertzaintza etengabe izan da inguruetan: "ia egunero etorri dira norbait identifikatzeko asmoz eta atzora arte (ostirala) ezin izan dute lortu". Era berean, Sopela eta Urdulizko gazteek salatu dituzte identifikazioak eskuratzeko Ertzaintzak erabilitako "demaseko" amarruak. Izan ere, gazteen arabera, identifikatutako gazte bat bere kotxera ez ailegatzeko poliziek patruila autoz moztu zioten bidea: "poliziaren jazarpena zirudien". "Gara"ri azaldu diotenez, ostiraleko operazioan Ertzaintzako bost auto parte hartu zuten, haietako hiru kalez jantzitako ertzainek erabili zituztela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun