Matematikako Olinpiadako finalerako sailkatu da Gazteluetako Diego Gonzalez
2006ko ots. 7a, 22:06
Leioako Gaztelueta ikastetxeko Diego Gonzalez Pinto (argazkian) bigarren sailkatu da Matematikako 42. Olinpiadako EAEko kanporaketa eta, horrela, martxoaren 23tik 26ra bitartean, Sevillan izango den finalean parte hartuko du ikasleak. Urtarrilaren 20an Euskal Herriko Unibertsitatean egin zen txapelketan, Donostiako Usandizaga BHIko Javier Goñi Mola izan zen irabazlea eta Bilboko Pureza de Maria Ikastetxeko Maria Belen Ansoleaga hirugarren sailkatua. Matematikako Olinpiada Espainiako Matematika Elkarteak antolatzen du. Lehen fase horretan Bizkaia, Gipuzkoa eta Arabako 43 ikaslek hartu zuten parte, gehienak Batxilergoko 2. mailakoak, unibertsitateko iturriek jakinarazitakoaren arabera.Lehiatzaileek hiru problema ebatzi behar izan zituzten goizean eta beste hiru arratsaldean. Saio bakoitzean hiru ordu izan zituzten hiru problemak ebazteko. Lehen postua lortu duenak 380 euro jasoko ditu sari, bigarrenak 285 eta hirugarrenak 220. Gainera, hiru irabazleok bigarren fasera –Sevillan– igaroko dira. Sevillan izango da, martxoaren 23tik 26ra bitartean. Bigarren fase horretan lehenengo sei sailkatuei urrezko domina eta 750na euro emango dizkiete, eta gainera nazioarteko talde olinpikora pasatuko dira, Nazioarteko Matematika Olinpiadan lehiatzeko, uztaileko lehen hamabostaldian, Eslovenian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun