Mugarik Gabe elkarteak proiektua martxan jartzea lortu du Guatemalako San Miguel Tucuru herrian, baserri zonaldeko emakume gazte indigenei ikasketa aurreratuak jasotzeko aukerak errazteko asmoz. Aurtengo dirulaguntza Magisteritza eta Erizaintza ikasketak burutuko dituzten zazpi emakumeei zuzenduta dago. Bestalde, Sopelako Udalak Adeco elkarteko Jose Maria Lopez Arostegui medikuak aurrera eramaten ari den egitasmoari laguntza eman dio berriro ere. Sendagilea Panamako Ngöbe eskualde indigenan lanean dihardu, orain dela hamalau urtetik hona. Gaur egun garatzen ari den proiektua ohiko medikuntza indigenaren antolaketa eta garapenaren gainekoa da, udal sopeloztarretik adierazi dutenez. "Lursailen kontzentraziorako eta laborantza tekniken berrikuntzarako izango da dirulaguntza. Horrek izurriteen aurrean indartsuagoak diren landareak lortzea eta sendatzeko printzipio aktiboen kalitatea hobetzea ahalbidetzen du", azaldu dutenez.
Sahararen aldeko II. Euskal Karabana
Datorren otsailaren 11n Bilboko Botika Zaharretik aterako da II. Euskal Karabana. Bertan, 40 ibilgailu baino gehiagok ekingo dio bideari Alacanteraino (Herrialde Katalanak), gero ferryan Oranera (Aljeria) eta handik basamortutik Tinduferaino (Aljeria). Lehenago Botika Zaharrean jaialditxoa egingo da, goizez, eta bertan ikusgai egongo dira 40 ibilgailu horiek goizeko 11etatik aurrera. Nuyum elkartearen eskutik, aipatu egunera arte batuko dira azukrea, atuna eta konpresak. Produktuak udaletxera eta hezkuntza zentroetara eraman daitezke.
Sopelako Udalak 68.095 euro emango dizkie nazioarteko lankidetza egitasmoetan diharduten Adeco, Nuyum, Mugarik Gabe eta Euskal Fondoa erakundeei, udalbatzak azken osoko bilkuran aho batez erabaki bezala. Dirulaguntzetako bat udalerriko Nuyum elkartearentzat izango da, saharar herriaren aldeko ekintzak burutzeko erabiliko duena. Elkarte horrek bidai bi egingo ditu Tindufeko (Aljeria) errefuxiatuen kanpamentuetara, hurrengo hilabeteetan, laguntza humanitarioa eta sendagaiak eramateko. Udal iturriek jakinarazitakoaren arabera, "horrelako egitasmoak laguntzeko, aurrekontuen %0,7a ematen du tokiko erakundeak". Argazkian, Sopelako Udalak eta bertoko Nuyum elkarteak antolatuta, Sahararen aldeko astearen barruan egin zen elkarretaratzea, 2005eko irailaren 28an.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun