Gazta Azoka izango da asteburu honetan Algortan

Bihar, ostirala, hasita eta igandera bitartean, Gazta Azoka izango da Algortako Geltoki Plazan. Bertan izango diren salmenta postuetan bisitariek jaki horretaz gozatu ahal izango dute. Jendeak zenbait mota eta jatorritako gaztak dastatzeko eta erosteko aukera izango du, ore biguneko gaztatik Idiazabal gaztara, ahuntz-gazta, ardi-gazta, titi-gazta, Erronkari gazta, gazta urdina edota gazta freskoa ahaztu gabe. Guztira, 11 saltoki izango dira, jatorri oso ezberdinetako ekoizleek parte hartuko dutelarik. Hiru egunetan zehar, bizkaitar, arabar eta nafarrez osatutako Euskal Herriko gaztagileen ordezkaritzaz gain, Galiziako, Asturiaseko eta Espainiako ekoizleek ere beren produktuak eskainiko dizkiote jendeari honako ordutegi honetan: goizez, 11:00etatik 14:30era eta, arratsaldez, 17:00etatik 21:30era.