Emakume bat zendu da Areetan metroak harrapatuta

Pertsona bat zendu da gaur arratsaldean metroko konboi batek harrapatuta. Ezbeharra Areetako geltokian jazo da, 15:24ean, Metro Bilbao konpainiako iturriek jakinarazi dutenez. Argitzeke dauden arrazoiak tarteko, emakume heldua trenbidera amildu da, Telefonicara ematen duen sarreratik hurbil, Plentziarako noranzkoan zihoan metroa geltokira sartzen ari zela eta bete-betean harrapatu du. Metro zerbitzua ez da eten baina atzerapenak egon dira; trenbide bakarra mantendu dute zabalik Leioa eta Aiboa artean. Hala ere, 16:15ak aldera, metro zerbitzua lehengoratu dute. Dagoeneko ezbeharra izan den tokitik atera dute gorpua epailearen aginduz. Oraindik ere ez dute emakumea nor den argitu.