Independentziaz beteriko astea feminismotik abiatu zuen Itzubaltzetako Segik atzo

Itzubaltzeta / Erromon atzotik eta datorren ostegunera bitarte antolaturiko "Borrokaz aske biziz... independentzia!" astearen barnean, feminismoaren aldeko borrokarekin hasi genuen atzokoan gure planteamendua. Atzo, hilaren 15a, "Feminismoaz aske biziz... independentzia!" eguna izan genuen gurean, eta goizetik hasi eta iluntzera bitarte hainbat ekimen burutu genuen. Besteak beste, eskuorrien banaketa egin zen Metro Bilbaoko sarreretan (Areetan eta Gobelan), panel informatiboak herrian zehar sakabanatu genituen eta panpin berezi batzuk ere toki estrategikoetan kokatu genituen. Baina eguneko ekimen garrantzitsuena iluntzeko 21:30ean izan zen gaztetxean; izan ere, Bilgune Feministaren eskutik hitzaldi-tailer-eztabaida izan baitzen bertan, 25 bat lagunek parte hartu zutelarik. Hitzaldi benetan aberasgarria, guztion artean zalantzak argitzeko baliatu genuena. Gaur "Errepresioaren gainetik aske biziz... independentzia!" eguna izango dugu, eta gure herrian gazteok jasan ditugun eraso mota guztiak salatzeko baliatuko dugu.