Getxoko Udalak 2005eko uztailaren 8an kaleratutako dekretu baten aurka, UGT sindikatuak aurkeztutako errekurtsoa aintzat hartu du Bilboko Lan Arloko 3. zenbakiko Epaitegiak, hainbat albiste agentziek zabaldu dutenez. "Langileei eta horien ordezkariei sindikatuen jardueretan parte hartzeko denbora eman diezaieten, langile erakundeek euren kideen kopuruaren berri eman behar ez dutela gogorarazten dio Iñaki Zarraoa alkateari sententziak", UGTk azaldutakoaren arabera.
Aipatu erakundeko Zerbitzu Publikoen Batzordeko kideek salatutakoaren arabera, udal dekretua "Getxoko Gobernu Taldeak daraman sindikatuen aurkako bidearen eta, bereziki, UGTren aurkako etengabeko jazarpenaren beste adibide bat baino ez da". Horrelako egoeraren ondorioz, "behin eta berriro epaitegian amaitzen dira langileen eta Udalaren arteko liskarrak, horrek dakarren denbora eta diru publiko galerarekin". "Zerbitzu publikoaren kalitatean ez dute batere ardurarik udal agintariek", UGTk kritikatu duenez. "Kalitate planak lau haizetara zabaltzen dituzten bitartean, neurriz gaineko behin-behinekotasunaz ez dira batere kezkatzen", gaineratu dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun