Datorren larunbatean haur liburutegia lehenengo aldiz ezagutzeaz gain hainbat ekitaldi burutuko dira umeentzako. Horrela, 11:30ak eta 14:30ak bitartean kale liburutegia egingo dute kultur etxeko plazan, karpapean. Bertatik igarotzen direnek saria eskuratuko dute: irakurtzeko agenda. Horretaz gain ipuin kontalariak, musika eta begiraleak izango dira.
Arratsaldean, 18:00etatik aurrera "Ipuinen Herria" izeneko ipuin antzeztuaren emanaldia izango da areto nagusian, ingelesezko zein euskarazko abesti, dantza eta jokuz lagunduta. Ekitaldia bukatu bezain laster herri txokolatada egingo dute.
Berangoko haur liburutegiak lehenengo aldiz ateak zabalduko ditu datorren larunbatean, otsailak 25, txikien gozamenerako. Egun horretan Berangoetako kultur etxean kokatuta dagoen udal liburutegiak irekiko du hiru urteko zein adin horren gaineko haurrentzako atala, egun osoko kultur jardueraz lagunduta. Berangoko Udalak jakinarazi duenez, "zerbitzu berri horrek udalak bizi duen haurren populazio hazkundeari erantzun" nahi dio. Izan ere, balizko erabiltzaileak 600 bat neska-mutil izango dira. Haur liburutegia erabili ahal izateko aurretik bazkide txartela egin beharko da kultur etxean bertan. Bere aldetik, liburutegiak hilero liburu berriak eskuratzeko konpromisoa hartu du, "txikienei etengabe irakurtzeko gonbitea eginez". Zerbitzua jendarteratzeko Berangoko Udalak eskuorriak bidaliko ditu udalerriko etxe guztietara. Argazkian, hainbat ume ipuin kontalari bat entzuten / Cortesko liburutegia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun