Larunbatean, hilak 18, gazteok Bilbon izan ginen, 18/98 auziaren kontra burutu zen nazio-mobilizazioan. Astelehenean, hilak 20, berriz, "Amalurraren defentsan aske biziz... independentzia!" eguna izan zen gurean. Ohiko kale-propagandaz gain, eguneko ekitaldi nagusia arratsaldeko 19:30ean Itzubaltzeta gaztetxean burutu zen. Bertan, Sopelako ezker abertzalearen udal plataformako zinegotzia den "Willy"k (Guillermo Vio) hitzaldia eman zuen LZPren inguruan (Lurralde Zati Plana). Bizkaiaren zati handi bat suntsituko duen plan horren inguruan aditzera etorri ziren lagunen kopurua 25ekoa izan zen; guztiek ala guztiek ere, adi-adi entzun zuten zertan datzan "garapen iraunkorrez" mozorroturiko sarraskia eta noraino helduko den.
Asteartean, hilak 21, "Ikasle borrokaz aske biziz... independentzia!" eguna izan da gurean. Atzokoan, kale-propaganda guztia gure herriko Getxo IV institutuan (Romo-Artatza institutua) kokatu genuen, bertako ikasleek haien egoeraz kontziente izan daitezen. Izan ere, iragan urteko balantze errepresiboari so eginez gero, erraz antzeman daiteke institutu hartako zuzendaritzaren jarrera zein izan zen: inposaketa amaigabeak eta eskubide urraketak.
Gaur eta bihar ere independentzia egunak
Gaur, hilak 22, "Langile borrokaz aske biziz... independentzia!" eguna izango dugu gurean, eta langile gazteen egoera kaleratzeko baliatuko dugu. Era berean, arratsaldeko 19:30etan lan-prekarietateari buruzko bideoemanaldia eskainiko dugu Itzubaltzeta gaztetxean.
Aste osoko laburpen-bideoemanaldia ere martxan da, eta hau bihar izango da ikusgai, eguraldi ona lagun, Areetako Xake plazan, iluntzeko 19:30ean. Besteak beste, Mobilizazio Eguna izango den honetan, 12:30ean Algortako Telletxe plazatik abiatuko den mobilizaziora joan dadin deituko diogu gure gazteriari.
Itzubaltzeta / Erromoko Segi
"Borrokaz aske biziz... independentzia!" astearen azken ekitaldietan parte hartzera deitu du Itzubaltzetako Segik
Iragan asteazkenean hasitako "Borrokaz aske biziz... independentzia!" astearen barnean, beste zenbait ekimen burutu ditugu Itzubaltzeta / Erromoko gazteok. Hona hemen orain arte egindako guztiaren kronika laburra: Ostegunean, hilak 16, "Errepresioaren gainetik aske biziz, independentzia!" eguna izan zen. Egun horretan kale-propaganda egin genuen (eskuorrien banaketa, panpin ezberdinak, panelak, kartelak...) herriko gazteon kontrako errepresio judizial eta poliziala salatzeko. Ostiralean, hilak 17, "Euskaraz eta kulturaz aske biziz.. independentzia!" eguna izan genuen. Bertan, aipaturiko kale-propagandaz gain (herriko egoera zein den salatuz: euskararen bazterketa eta erabilpen interesatua...), eguneko ekitaldi nagusia gauez heldu zen. Izan ere, iluntzeko 21:30ean bertso-afaria hasi baitzen Itzubaltzeta gaztetxean, "bertsotan aske biziz... independentzia!" lemapean. Afari goxo eta bapo baten ostean, gure bertsolari gonbidatuek, Amaia Agirrek eta Xabi Payak, bertaratutako 80 lagunen barreak eragin zituzten, eta gai-jartzailearen gaiei ere ederki erantzun zieten. Benetan gogoangarria, bertso-afaria. Ez zen faltan izan, bertsolaritzan aritu ez izanagatik, bertsotan hasi zenik ere! Argazkian, bertso-afariko irudi bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun