Merkataritza alorrean langabetuentzako bi ikastaro antolatu ditu Getxoko Behargintzak
2006ko ots. 23a, 09:45
Martxoaren hasieratik eta apirilaren 24ra arte egongo da zabalik Getxo Ekinean II egitasmoaren harira merkataritza / banaketa alorrean langabetuentzat antolatutako trebakuntza ikastaroetan izena emateko epea. Getxoko Udalak sustatuta eta Europako Gizarte Fondoak, Bizkaiko Foru Aldundiak eta tokiko erakundeak berak finantzatutako ekimen horren helburua “lana topatzeko zailtasun handiak dituzten pertsonei –gizarte laguntzak jasotzen dituztenei– lana ematea” da, Iñaki Zarraoa alkateak atzo adierazitakoaren arabera. Helburu hori lortu aldera, bi ikastaro eskainiko: arrandegiko saltzaileak eta kutxazain / apal betetzaileak trebatzekoak. Horren guztiaren gaineko argibideak nahi dituztenek edota izena eman nahi dutenek Algortako Enplegu eta Ekonomi Garapenerako Zentrora, Behargintzara (argazkian), jo dezakete (Martin Deuna kalea, 17. Telefono zenbakia: 944 660 140).Prestakuntza ibilbide horietan zehar “norberari egokitutako laguntzaren bidez, enplegurako oinarrizko gaitasunen, lana bilatzeko estrategien, lantokiko praktiken eta, ondoren, lan munduan sartzea errazteko bideen gaineko trebakuntza” eskainiko zaie ikasleei, Zarraoak azaldu zuenez. Halaber, dirulaguntza beka jasotzeko aukera izango dute partehartzaileek. Ikastaroak maiatza hasierako egunetan abiatuko dira, laupabost hilabeteko iraupena izango dute ziurrenik, eta 30 bat lagunek parte hartu ahal izango dute horietan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun