Adin guztietako lagunentzako ekitaldiak prestatu ditu Maritxu Teilagorri jai herrikoien aldeko kultur taldeak, bihar, otsailak 24, 17:30etik aurrera Leioan ospatuko diren 2006ko Inauterien barruan. Txikienak ez ezik, gazteak eta helduak ere jaiaz gozatzeko aukera izango dute, beraz, Leioako Udala ren eta Leioako Merkatarien Elkartearen laguntzaz prestaturiko egitaraua dela medio. Naroa Jauregizuria eta Alaitz Bilate jai batzordeko bozeramaileek jakinarazi dutenez, ekitaldi guztiak Euskal Etxeen plazan (Arkupe plazan) izango dira. Bertan, haur jolasak, puzgarriak, pintura tailerrak, musika eta animazioa egongo dira Maritxu Teilagorriko begiraleen eskutik. 18:30etik aurrera pailazoen emanaldia egingo da eta berau bukatzean, 19:30ak aldera, txokolatea banatuko da. Argazkian, Maritxu Tellagorrik urtarrilean egin zuen urteko egitarauaren aurkezpena Udondo gaztetxean.
Maritxu Teilagorritik eskari berezia egin die guraso leioztarrei seme-alabak mozorrotuta joan daitezen, baita aita-amek beraiek mozorroa jantzita eramateko eta txokolate-jana ostean Euskal Etxeen plazatik abiatuko den mozorro kalejiran parte hartzeko ere. Aipatu martxa 20:30ean abiatuko da txarangaz eta malabaristez lagunduta Sakonetaraino. Bertan mozorro lehiaketan izena emateko edota berau ikusteko aukera egongo da. Azkenik, gauean, Kurkudi kultur taldeak antolatutako bertso afariaz gozatzeko gonbitea luzatu die Maritxu Teilagorrik Leioako eta inguruko bertsozale eta euskaltzale guztiei.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun