"Guztiok daukagu iritzia emateko eskubidea" lelopean, Areetan ere Kataluniaren Estatutu berriaren kontrako sinadurak batzen ari da Alderdi Popularra. Estatu espainiar osoan diharduen bezala, PPk Areetako Zugatzarte etorbideko 8. zenbakian duen egoitza irekita dauka, nahi duenak Madrilgo Kongresuan onartzear dagoen Kataluniaren Estatutu berriaren kontra bere sinadura eman ahal izateko. Hurbiltzerik ez duena, berriz, popularren egoitzara dei dezake 944 801 111 telefono zenbakia sakatuz. Gainera, Internetez ere sina daiteke proposaturiko testua, http://firmas.pp.es/ webgunean izen-abizenak eta DNI zenbakia emanez.
Sinadura bilketaren bidez, Espainiako Gobernuaren presidenteari eskatzen diote honako galdera estatuko hautesle guztiei erreferendumean egitea: "Espainia bere hiritar guztiak eskubide, behar eta prestazio publikoak eskuratzen berdinak diren nazio batua izaten jarraitzeari egoki deritzozu?". PPko kideen ustez, aipatu galderari baietza eman eta Kataluniako Estatutua onartzea ez datoz bat. Popularrek jakinarazi dute 2.011.392 sinadura batu dituztela 23 egunotan. Tartean, Jose Luis Rodriguez Zapateroren sinadura ere jaso dute, neska bati autografoa ematen ziolakoan sinadura kanpainako paper batean bere izena idatzi zuena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun