Erandioko Udala irailaren 27an epaituko dute kutsadura akustikoari buruzko datuak ukatzeagatik
Erandioko Udala akusatuen jesarlekuan eseri behar izango da datorren irailaren 27an, Txorierriko Lur Maitea elkarte ekologistak bere kontra jarritako salaketa dela eta. Lur Maiteako kideek 1998an AENAri, Eusko Jaurlaritzari, Bizkaiko Foru Aldundiari eta Loiu, Derio, Sondika eta Erandioko udalei Bizkaiko aireportuan egiten ari ziren lanek eta abioiek sortzen zuten zaraten inguruko informazioa eskatu zieten, Txorierriko hainbat biztanlek Ertzaintzari eginiko kexak dokumentatzeko. Dezibelen neurketa udal eskumena izanda, ekologistek auzitegietara jo zuten ustez aireportuko kutsadura akustikoa bermatzen ari ziren udalen kontra. Dagoeneko, Sondikako Udala epaitu dute, oraindik epaia eman gabe dagoela. Deriok martxoaren 30ean izango du auzia eta Loiuk ez dauka oraingoz datarik. Bestalde, Lur Maiteak berriki salatu zuen Asuako Macro eta Carrefour (lehengo Pryca) merkataritza zentroen arteko lurzorua kutsatuta dagoela. (Argazkian, Mikel Arieta-Araunabeña Erandioko alkatea).
2005eko uztailean Guardia Zibileko natura zaintzeko taldeak (Seprona) ikertu zuen bertako lurrak Bilboko 7. epaitegiak aginduta. 2003an, Lur Maiteak epaitegi horretan salatu zituen Erandioko Udala, Eusko Jaurlaritzako Ingurumen Saila, Ihobe eta Edinasa enpresak Prycari saldutako lurretatik lindanea kentzeko ondoko lurzorura mugitu eta 1995etik 2002ra Asua ibaia kutsatu zutelakoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun