Hirigintza Antolamendurako Plan Orokorra (HAPO) aldatzea onartu zuen behin-behinean, otsailaren 23an egindako osoko bilkuran, Leioako Udalbatzak, Lamiako eta Txorierri lotuko dituen igogailua eraiki ahal izateko. Karmelo Sainz de la Maza alkateak gaur adierazitakoaren arabera, "bertoko bizilagunek aurkeztutako alegazioak hartu ditugu kontutan". Algortan Ereaga hondartza eta Maria Cristina parkea artekoaren antzekoa izango da azpiegitura, mendi-hegalean etzanez, gaur egun dauden eskailerak saihesteko asmoz –Lamiakotik 50 bat metro gorago dago Txorierri–. Egitasmoak bi milioi eurotako kostua izango du, Leioako Udalak berak osorik ordainduko duena, eta 2007an eraikitzen hastea espero dute.
2005eko irailaren 29an ere HAPO aldatzea onartu zuen behin-behinean Leioako Udalbatzak, horren bidez, "Txorierri auzoaren hirigintza burutu eta beraren eta Lamiako-Txopoeta auzoaren arteko irisgarritasun arazoa konpontzeko asmoz". Orduan, salneurri libreko 74 etxebizitzetako blokea altxatzea aurrikusten zuten. Oraingoan, berriz, etxe kopurua 48ra murriztu eta hiru bloke egitea erabaki dute. Horrekin batera, berain artean aldendurik dauden Txorierri auzoko bi guneen artean –1 eta 7 zenbakiko atariak, eta 46 eta 48 zenbakia dutenak– oinezkoentzako zumardia egitea ahalbidetuko du egitasmoak. Hain zuzen ere, azken bi horien alboko plazatxoan izango du geralekua igogailuak, gaur egun Lamiakora jaisteko eskailerak hasten diren tokian bertan. Bertatik mendi-hegaletik behera joango da garraio berria, aipatu bigarren auzoan egiten ari diren babes ofizialeko 76 etxebizitza pareraino. "Mendi-hegala bera atondu eta oihaneztatzea ere aurrikusten du proiektuak" udal arduradunen esanetan. Bizkaiko Foru Aldundiaren esku dago HAPOren aldaketa behin betiko onartzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun