Martxoaren 18rako txangoa eta txotx antolatu dute Egizukoek
2006ko mar. 2a, 22:18
Datorren martxoaren 18an, larunbata, txango ederra eta txotx ederragoa oraindik egiteko aukera izango dute Egizuko berbalagunek. Baina ez haiek bakarrik, aurreko urteotako ohiturari jarraituz Urtuellako Autrigoiek, Muskizko Ostabekoek zein Mahatserriko Asapalakoek lagunduko dituzte Gipuzkoan barrena. Goizean 9:45 gelditu dira Algortako metro geltokian trena hartu eta San Mamesetik autobusez Gipuzkoa aldera abiatutzeko. Lehenengo geldialdia Zumaian burutuko dute berbalagun bizkaitar guztiek. Bertan, Kaiargi taldeak harrera egin eta bertako Algorri interpretazio zentrua erakutsiko dielarik. Ondoren Zumaiako amildegiak eta kostaldea ikusteko ibilaldi labur baina interesgarri bat gozatzeko parada izango dute. Jarraian, Asapalak jakinarazi duenez, ordu erdiko paseoa emango dute errekatik zehar itsasontziz. Paraje eder hori bisitatu ostean, Asteasu aldera abiatuko dira, Sarasola sagardotegira, natura erdian eta famatua den Ernio mendia atzean duelarik. Bertan, txotx artean bazkaltzea da plana.Arratsaldea, berriz, Azpeitin emango dute poteoan, dagoeneko euskaldun giroan guztiz murgildurik eta eguna poz-pozik amaitzeko asmo sendoarekin. Bilbora 23:00ak aldera itzuli eta batzuk etxera eta festazaleenak Deusturantz joko dute, San Pedroetara. Programa ososa, Algortako bertsolari, trikitilari eta pandero joleek girotuta, tartean Xabier Paya algortarra. Izena martxoaren 9ra arte eman daiteke honako bideak jarraituz: egizugetxo@yahoo.com e-posta, www.blogari.net/egizu webgunea edo 605 739 916 telefonoa. Prezioa 25 eurokoa da, autobusa eta bazkaria barne.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun