Besteak beste, genero indarkeriaren kontra lan egitea izango da arlo berriaren helburuetako bat. Dobaranek azaldu duenez, "berdintasunik ez dagoelako azaltzen da emakumeen kontrako indarkeria. Berdintasunaren alde lan egiten dugun heinean, indarkeria saihestuko dugu". Horren harira, udal bakoitzean protokoloak ezarriko dira genero indarkeriaren biktimei laguntzeko eta horri buruzko gira argitaratuko dute. "Horrela, mezua helarazi nahi diegu emakumeei: egun bat gehiago ere egoera hori jasan ez eta salatu dezatela; eta beste bat gizonezkoei: besoak gurutzaturik ez garela egongo eta Uribe Kostako herriek beharrezkoak diren urratsak emango ditugula genero indarkeriaren aurka borrokatzeko", adierazi du Berangoko alkateak. Horretaz gain, sentsibilizazio kanpainak zuzenduko zaizkie auzotarrei. Dobaranen hitzetan, "Uribe Kostan ume eta gazte asko ditugu eta, hortaz, handiagoa da erantzukizuna. Eskolek, familiek eta udal ordezkariek neska-mutilak berdintasunean hezteko konpromisoa hartu behar dugu egungo esteriotipoak apurtzeko".
Elkarlana
Eudel eta Emakunderekin batera, emakume eta gizonen berdintasuna lortzeko programa eta jarduerak antolatu eta koordinatzea; eta Emakume eta Gizonen Berdintasunerako 4/2005 Legea betetzen laguntzea ere dira Berdintasun Atal berriaren helburuak. Aipatu legea "Europa mailan erreferentea" dela azpimarratu du Dobaranek, baita "lege hori gauzatuz, orain hitzetatik ekintzetara" igaro behar dela ere. Hori dela eta, Berdintasun Planak sustatuko dira Mankomunitateko udalerrietan, Legeak ezartzen duen moduan.
Berdintasun arloan lan egingo duen atal berria sortu eta gai horretan aditua den teknikari bat kontratatuko du Uribe Kostako Mankomunitateak, Juan Olea aipatu erakundeko presidente eta Urdulizko alkateak eta Miren Dobaran Berangoko udal agintariak iragarri dutenez. Mankomunitateko udalerriek emakume eta gizonen arteko berdintasunaren alde duten "konpromiso irmoaren adierazle" da ekimena, Dobaranen hitzetan; prentsaurrekoan agertuta, Imanol Garai Sopelako alkateak, Jose Maria Ezpeleta Barrikakoak eta Pedro Botejara Lemoizkoak berretsi dutenez –Gorliz eta Plentziako zinegotziak ere egon dira bertan–. "Orain arte, udal bakoitzak bere lan egin du berdintasun gaietan eta, gure ustez, eraginkorragoak izango gara batera lan egiten badugu, beste arlo batzuetan bezala", azaldu du alkate berangoztarrak. Gaineratu duenez, "generoaren perspektiba kontutan izango dugu udal politikak garatzerakoan, udalerriok garelako guztiok nahi dugun berdintasuna lortzeko motorea". Argazkian, ezkerretik eskuinera, Botejara, Dobaran, Olea, Garai eta Ezpeleta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun