Euskal Herrian Euskarazek salatu duenez, Basabe "testigu bezala deklaratzera joan eta inputatu gisa bukatu du azkenean". Aipatu delitua egotzita zortzi hilabeteko espetxe zigorra eskatzen du fiskalak lagun horrentzat. Ez da lehen aldia itzultzailea ez onartzegatik pertsona bati zigorra jartzen zaiona, baina bai da lehen aldia espetxe zigorra eskatzen dena “arrazoi” horiek kontuan hartuta.
EHEk salatu du egoera hori eta baita kasu horretan erantzule diren guztien jarrera ere; epaitegiak eta baita kasu horretan erantzule zuzena den Eusko Jaurlaritza: "argi esan behar diegu honaino heldu garela, onartezina dela hizkuntza eskubideak bermatuak izan daitezen eskatzeagatik isunak jartzea eta are gehiago maila horretako zigorrak jartzea. Argi esan nahi diegu ez dugula iruzur gehiagorik onartuko, izan ere, hori da euskaldunei egiten digutena etengabe: hitz politak dituzte euskararentzat eta ekintzez egurra ematen digute gure eskubideak aldarrikatzeagatik".
Aurrekari bihur liteke
Asteartean egingo zaion epaiketan, Asier Basabek bere jarrerari eutsiko dio aurretik jakinarazi duenez. EHEk nabarmendu du epaiketa hori "lehen kasua izanagatik, aurrekaria sortzeko erabili dezakete" Justizia Administrazioak zein Eusko Jaurlaritzak. Erakunde horiei ere leporatu die epaiketak euskaraz egiteko oztopoak jartzea.
Erakunde euskaltzaleak adierazi duenez, Asier Basabek orain arte hasitako bideari helduko dio eta baita EHEk ere. Ildo horretan, epaiketa egiten den unean elkarretaratzea egingo dute epaitegi aurrean. EHEren iritziz "egoera hori, baina orokorrean, egunero jasan behar izaten dugun gutxiagotze eta zapalkuntza salatzeko" egingo dute aipatu ekimena. Era berean, Hizkuntza Eskubideen Behatokiak ere badu kasuaren berri eta behatzaile moduan egongo da asteartean Bilbon.
Espetxe zigorra eskatu dute lekuko batentzat euskara hutsez deklaratu nahi izateagatik
2006ko mar. 5a, 22:03
Datorren asteartean, hilak 7, goizeko 9:30ean Gernikako euskaltzale bat epaituko dute Bilboko Buenos Aires kaleko Zigor Arloko Epaitegian desobedientzia delitu bat leporatuta. Fiskalak zortzi hilabeteko espetxe zigorra jarri nahi dio euskara hutsez deklaratu nahi eta itzultzailea ukatzeagatik. Orain dela hilabete batzuk, Asier Basabe euskaltzale gernikarra istripu batean lekukoa izan zen eta ezbeharra argitzeko egin zen epaiketan deklaratzera deitu zuten, testigu gisa. Bere deklarazioa euskaraz egin nahi zuela azaldu zien euskaltzaleak epaitegiko kideei. Itzultzailea jarri zioten orduan baina aipatu lagunak, bere hizkuntza eskubideak urratu egiten zitzaizkiola argudiatuz, itzultzailea erabiltzeari uko egin zion. Ondorioz, Desobeditze delitua egitea egotzi zion Bilboko Zigor Arloko Epaitegiak. Bista burutzen den bitartean, Basaberekin elkartasunean eta Justizia Administrazioaren aurrean euskaldunak bigarren mailako herritarrak direla salatzeko epaitegien aurrean elkarretaratzera deitu du Euskal Herrian Euskaraz erakundeak. Bestalde, Hizkuntza Eskubideen Behatokiko kide bat behatzaile lanak egingo ditu.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun