Martxoaren 8rako manifestazioa deitu du sortu berri den Uribe Kosta Emakume Plataformak
Emakumeen Mundu Martxako Euskal Herriko Plataformaren harira, eskualdean Uribe Kosta Emakume Plataforma osatu berri dute Getxoko Bilgune Feministak eta LAB eta ELA sindikatuek. Gauzak horrela, martxoaren 8a Emakumeen Nazioarteko Eguna dela eta, hainbat ekitaldi antolatu dituzte Algortako San Nikolas plazan, "jai giroa eta aldarrikapenak uztartuz". 19:30ean laburmetraia proiektatuko dute bertan. Ordu erdi beranduago, berriz, manifestazioa izango da. Horren amaieran, manifestua irakurri eta dantza garaikide erakustaldia, Getxoko dantza eskolaren eskutik, eta bertsolariak egongo dira ondoren. Argazkian, Bilgune Feminista eta Euskal Herriko Emakumeen Mundu Martxako Koordinadorak deituta, Arriluzeko kaiatik txalupan abiatu ziren Ibaizabal gora, Uribe Kostako 35 bat emakume, maiatzaren 24an, Emakumeen Mundu Martxa hastearekin batera / Gaztesarea.net.
"Badira hilabete batzuk, Uribe Kostan emakumeok gure eskubideen alde egiteko bateratuko gintuen plataforma sortu nahian gabiltzala. Gaur egun hiru eragilek osatzen dugu. Hala ere, badaude gurekin kontaktuan beste batzuk", adierazi dute Uribe Kosta Emakume Plataformatik. Halaber, "emakume-talde edo giza-talde guztiei dei" egiten diete erakundean parte hartzera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun