Getxo udalerriko ertzain-etxeko agenteek 16 eta 17 urteko adin txikiko lagun bi atxilotu dituzte gaur goizaldean Sopelan gozoki-denda batean lapurreta egitea leporatuta. Eusko Jaurlaritzako Herrizaingo Sailak adierazitakoaren arabera, "patruila-auto batek ikusi ditu gazteak, denda horretako erakusleihoa apurtu ondoren, gozoki-kaxa batzuk lapurtzen ari zirela". Beharrezko izapide polizialak burutu ostean, aske utzi dituzte adin txikikoak.
Goizaldeko ordu bata eta erdietan izan da lapurreta saiakera Sopelan. Herrizaingo Sailak helarazitako prentsa-oharraren arabera, "Ertzaintzako patruila-auto batek gazte batzuk gozoki-denda batean osten ikusi ditu. Kristal-hotsa entzun dute polizia agenteek eta sei bat laguneko gazte-taldea dendako erakusleihoa mailu batekin apurtzen ikusi dute. Gozokiz betetako hainbat kaxa ostu dituzte lapurrek, eta, ertzainak ikustean, ihesari eman diote". Ertzainek haien atzetik joan dira eta susmagarrietako bi harrapatzea lortu dute (gizonezkoak eta adin txikikoak biak, 16 eta 17 urtekoak), atxilotu egin dituzte eta polizia autonomikoaren komisariara eraman dituzte, indarra erabilita lapurreta egitea egotzita. Beharrezko izapideak burutu ondoren, aske utzi dituzte, baina epailearen aurrean aurkeztu beharko dute berak hala eskatzen duenean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun