Metroak atzeratuta ibili dira gaur goizean, bederatzietatik hamarretara bitartean, gutxi gorabehera. Atzerapenak San Inazioko geltokiko orratzaren motorea apurtu delako izan dira, Metro Bilbao konpainiak prentsa-ohar bidez jakinarazi duenez. "Orratzarekin trenak Sestaora (2. linea) ala Plentziara (1. linea) bideratzen dira", azaldu dutenez. Matxura 8:45ean gertatu da. Aginte Toki Nagusiak, orduan, larrialdien protokoloa abiarazi du. Arazoa gertatu eta ordu betera, talde espezializatu batek konpontzea lortu du eta zerbitzuari berrekin zaio, sistema guztiak funtzionatzen ari zirela eta, hartara, metroaren ohiko zerbitzua 9:45ean normal zebilen jada.
Matxura konpondu arte metroak 20 minutu atzeratzera ere heldu dira. "Arazoa izan den tarte horretan, ohi baino polikiago joan dira metroak, mugimenduak seguruak zirela bermatu nahi baitzen", zehaztu dute Metro Bilbao konpainiako arduradunek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun