"Terroristen omenezko manifestazioak" galarazteko eskatu du Getxoko PPk
2006ko mar. 21a, 22:53
"Azken aldian terroristen omenez Algortan egiten ari diren ekitaldi eta manifestazioen aurrean", Iñaki Zarraoa alkateak eta Javier Balza Herrizaingo sailburuak agertutako "pasibotasuna" salatu du gaur Marisa Arrue Getxoko PPko bozeramaileak. Zinegotzi popularrak azaldutakoaren arabera, "otsailaren 10ean manifestazioa baimendu zuen Algortan Eusko Jaurlaritzako Herrizaingo Sailak eta, bertan, Ertzaintzak eskolta emanda egon ziren erradikalak, inortxo ere hura galarazteko ezer egin ez zuela. Hil horren 17an eta 22an ere inguru erradikalak deitutako protestaldiak egon ziren eta, orduan baimenik ez zeukaten arren, udaltzainek zaindu zituzten martxak, inor identifikatu edota atxilotu gabe". Hain zuzen ere, horiek eragoztea eskatuko du PPk. "Horren aurrean ezin gara isilik geratu eta horrela jakinaraziko dugu asteazken honetako (martxoak 22) udal batzordean, talde terroristaren ingurukoen manifestazioak baimenik gabe egiten utz ez ditzaten", aipatu du Arruek. Antza denez, Uribe Kostako ezker abertzaleak "Euskal herritarren erabakia errespetatu!" lelotzat hartuz, otsailaren bigarren asterako deitu zituen ekimenen baitan egindako manifestazioari buruz ari da lehenengo kasuan Getxoko PPko bozeramailea; eta Gotzon Alcalde sopeloztarra eta Leire Etxebarria basauritarraren atxiloketak salatzeko protestari buruz bigarrenean. Hirugarrena egin zenetz, aldiz, konfirmatzerik ez du izan UKBERRI.NETek."Erradikalek egindako birrinketez gain, horrelako ekitaldiek sortzen dituzten enbarazuak jasan behar izaten dituzte Algortako auzotarrek; Zarraoa eta inguru erradikalaren arteko elkar hartzeari esker baimendu eta bultzatutako ekintzak dira gainera. Begi bistakoa da, azken aldian, kale borroka eta erradikalen jazarpena berrindartzen ari dela gure udalerrian. Gure esku dauden bitarteko guztiekin egin behar diogu horri aurre", adierazi du Arruek. Azkenik, "gure kaleetan horrelako ekintzak galaraztea" eskatu dio Balzari zinegotzi popularrak. "Bere eginbeharra bete dezala espero dugu", gaineratu du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun