Bideoaren transkripzioa: (berria.info)
Euskadi Ta Askatasunak 2006ko martxoaren 24tik aurrera ekintza armatuen etenaldi iraunkorra abiatzea erabaki du. ETAren erabakiaren xedea Euskal Herrian burutu beharreko prozesu demokratikoa bultzatzea da. Euskal Herriarentzat marko demokratikoa eraiki behar da, gure herri eskubideak aitortuz eta etorkizunari begira eta aukera politiko guztiak ahalezko eginez. Prozesu horren buruan euskal herritarrek beren etorkizunari buruzko hitza eta erabakia izan beharko dute.
Espainia eta Frantziako estatuei Euskal Herriko eztabaida demokratikoaren emaitzak errespetatzea dagokie, inolako mugarik gabe. Euskal herritarrok gure etorkizunari buruz erabakiko duguna errespetatu beharko dute.
Eragile guztiei ETAk egindako urratsaren neurri bereko erantzunkizunarekin jokatzeko deia egiten diegu. Espainia eta Frantziako agintariei egoera berriari erantzun positiboa eman eta jokabide errepresiboak alboratzeko deia luzatzen diegu.
Oro har, euskal herritarrei dei zabala egiten diegu prozesuan buru-belarri murgiltzeko eta gure herri eskubideen alde borroka egiteko.
ETAren borondatea eta nahia, zabaldutako prozesua burura eramatea eta Euskal Herrian benetako egoera demokratikoa eskuratzea da, urte luzetako gatazka gaindituz eta justizian oinarrituriko bakea eraikiz. Aurrerantzean, borondate horren araberako urratsak egiten jarraitzeko konpromisoa berresten dugu. Gatazkaren konponketa, gaur eta hemen, posible da. Hori da ETAren nahia.
Gora Euskal Herria askatuta!
Gora Euskal Herria sozialista!
Jo eta ke independentzia eta sozialismoa lortu arte!
Argibide gehiago eta hainbat politikari eta eragileen erreakzioak:
berria.info
ETAren bideoa ikusteko (Real Player):
Bideoa (rm)
Real Player aplikazioa eskuratzeko:
Linuxerako bertsioa
Windowserako bertsioa
Macintosherako bertsioa
"Berria" egunkariak bere edizio digitalaren bidez jakinarazi duenez, Euskadi Ta Askatasuna erakundeak bideo (rm) baten bidez iragarri du bihar, gauerditik aurrera, su-eten iraunkorra abiatuko duela. Martxoaren 24ko 00:00etan hasiko den alde bateko “ekintza armatuen etenaldi iraunkorraren" bidez euskal erakunde armatuak Euskal Herrian “prozesu demokratiko bat” bultzatzea du xede. ETAren ustez prozesu hori bere azkenera hel dadin euskal herritarren “hitza eta erabakia” onartu behar da. "Berria"k argitaratu duenez, bideoa berria.info-ra igorri du ETAk. Grabazioak 96 segundu irauten du eta ETAko hiru kide agertzen dira baina kide bakarrak egiten du hitz, emakumez batek, alegia. Argazkian, bideoaren irudi bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun