PPk izan ezik, ETAren su-etena "begi onez" ikusi dute Getxoko Udalean ordezkaritza duten alderdi politikoek

Getxoko Udalean ordezkaritza duten alderdi politikoek ETAk iragarritako su-eten iraunkorraren gainean balorazioa egin dute. Iñaki Zarraoa alkateak esan du, "une historikoa eta itxaropentsua" dela nahiz eta, bere iritziz, "su-eten iraunkorra nahikoa ez" izan. EAJren izenean, Imanol Landak uste du "berri ona" dela, "euskal gizartearen galde-eskeari erantzun eta itxaropenari atea irekitzen diolako". Era beretsuan azaldu dira EA eta EB-Berdeak udal gobernuko kideak. Fernando Burzakok (EA) "begi onez" ikusten du ETAren iragarpena, baina bere iritziz "gobernu zentralak ere fitxa mugitu behar du". Iñaki Urkizak (EB), berriz, "bakerako urratsa" dela dio. Desberdintasunak oposizioko alderdien artean izan dira. Luis Almansa Getxoko PSE-EEko bozeramaileak ETAren su-etenaren iragarpena "gauza ona" dela uste du, erakunde armatuari armak uztea eskatu dion arren. Marisa Arrue popularrak, aldiz, "era zuhurrean eta ezkortasunez" hartu du albistea, "1998ko su-etena zelan amaitu zen ikusita".