Ertzaintzak 16 urteko mutil bat atxilotu zuen atzo arratsaldeko lehen orduan Erandion, auto bat ostu eta, bideko erabiltzaileen segurtasuna arriskuan jarrita, ausarkeriaz gidatzea egotzita, Eusko Jaurlaritzako Herrizaingo Sailak jakinarazitakoaren arabera. Ibilgailua larunbat goizaldean lapurtu zuten Basaurin. Autoaren jabearen senide batek Galdakao inguruan ikusi zuen atzo arratsaldean eta, atzetik segika zihoan bitartean, Ertzaintzari jakinarazi zion. Basauri parean zegoen patruila-auto batek ibilgailua ikusi zuen, abiadura bizian, eta haren atzetik abiatu zen.
Polizia iturrien arabera, ertzainek bide bazterrean gelditzeko adierazi zioten hots eta argi seinaleen bidez, baina gidariak ez zien jaramonik egin. A-8 autobidean aurrera segitu zuen eta, bide osoan, ibilgailuak sigi-sagan aurreratzen eta bideko gainerako erabiltzaileak balaztada bortitzak egitera behartzen ibili zen. Gidaria Erandio Goikora arte heldu zen hainbat patruila atzean zituela, eta, bertan istripu txiki bat izan ostean, autotik jaitsi eta mendirantz ihes egin zuen. Agenteek sasitza artean ezkutatuta topatu eta atxilotu egin zuten, ibilgailua lapurtzea eta ausarkeriaz gidatzea leporatuta. Herrizaingo Sailaren arabera, adin txikikoak epailearen bost bilaketa-agindu zituen betetzeko, eta 50 aldiz baino gehiago atxilotu dute denetariko delituak direla eta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun